ന്യൂജഴ്‌സി: വരാനിരിക്കുന്ന തെരഞ്ഞെടുപ്പില്‍ ഡെമോക്രാറ്റിക് പാര്‍ട്ടി നേതാവായ ജോ ബൈഡനോട് താന്‍ തോല്‍ക്കുന്നത് കാണാന്‍ ചൈന കാത്തിരിക്കുകയാണെന്ന് യു.എസ് പ്രസിഡന്റ് ഡൊണാള്‍ഡ് ട്രംപ്. ന്യൂജഴ്‌സിയില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു ട്രംപ്.
ഉറക്കംതൂങ്ങിയായ ജോ ബൈഡനോട് ഞാന്‍ പരാജയപ്പെടണമെന്നാണ് ചൈനയുടെ ആഗ്രഹം. വരുന്ന തെരഞ്ഞെടുപ്പില്‍ അത് കാണാനാണ് അവര്‍ കാത്തിരിക്കുന്നത്. ജോ ബൈഡന്‍ അധികാരത്തിലെത്തിയാല്‍ നമ്മുടെ രാജ്യം സ്വന്തമാക്കാമെന്ന് ചൈന ആഗ്രഹിക്കുന്നുണ്ട്. ഇറാനും ഇത്തരത്തില്‍ ആഗ്രഹിക്കുന്നു. തെരഞ്ഞെടുപ്പില്‍ ജയിച്ചാല്‍ ഇറാന്റെ കാര്യത്തില്‍ ഒരു തീരുമാനം ഉണ്ടാക്കും- ട്രംപ് പറഞ്ഞു.
അതേസമയം ചൈന ഒരു വലിയ ഭീഷണി തന്നെയാണെന്ന് ട്രംപ് പറഞ്ഞു. അതിനിടെ ചൈന ട്രംപ് പരാജയപ്പെടാന്‍ ആഗ്രഹിക്കുന്നതായി യു.എസ് ഇന്റലിജന്‍സും വെളിപ്പെടുത്തി.
ട്രംപ് പ്രവചനാതീതന്‍ ആയതിനാലാണിതെന്ന് ദേശീയ ഇന്റലിജന്‍സ് ഡയരക്ടര്‍ വില്യം ഇവാനിന പറഞ്ഞു. ഇറാനും ട്രംപിനെതിരേ പ്രചാരണം നടത്തുന്നുണ്ടെന്നും റഷ്യ ജോ ബൈഡന്‍ വിജയിക്കുന്നതാണ് ഇഷ്ടപ്പെടുന്നതെന്നും അദ്ദേഹം കൂട്ടിച്ചേര്‍ത്തു.