കയ്പമംഗലം: ഹെല്‍ത്തി കേരളയുടെ ഭാഗമായി കയ്പമംഗലം പ്രാഥമികാരോഗ്യ കേന്ദവും ഗ്രാമപഞ്ചായത്തും സംയുക്തമായി ഗ്രാമപഞ്ചായത്തിലെ വിവിധ പ്രദേശങ്ങളായ മൂന്നുപീടിക, കയ്പമംഗലം ബീച്ച്, വഴിയമ്പലം, കാളമുറി എന്നിവിടങ്ങളിലെ സ്ഥാപനങ്ങളില്‍ പരിശോധന നടത്തി. ഹോട്ടലുകള്‍, കൂള്‍ബാറുകള്‍, ബേക്കറികള്‍, ഇതര സംസ്ഥാന തൊഴിലാളികളുടെ ക്യാംപുകള്‍ ഉള്‍പ്പെടെയുള്ള സ്ഥാപനങ്ങളിലാണ് ആരോഗ്യവകുപ്പ് അധികൃതര്‍ പരിശോധന നടത്തിയത്.
പരിശോധനയില്‍ ക്രമക്കേട് കണ്ടെത്തിയ സ്ഥാപനങ്ങള്‍ക്ക് നോട്ടിസ് നല്‍കുകയും പിഴ ഈടാക്കുകയും ചെയ്തു. വൃത്തിഹീനമായ ചുറ്റുപാടുകളില്‍ ഭക്ഷണം പാകം ചെയ്യല്‍, വൃത്തിയില്ലാത്ത പാത്രങ്ങളുടെ ഉപയോഗം, പകര്‍ച്ചാ വ്യാധികള്‍ പടര്‍ത്തുന്ന സാഹചര്യം സൃഷ്ടിക്കല്‍, അശാസ്ത്രീയമായ മാലിന്യ സംസ്‌കരണം, പൊതുജന ആരോഗ്യത്തിന് ശല്യവും ഹാനികരവുമായ പ്രവര്‍ത്തനങ്ങള്‍, ലൈസന്‍സ് ഇല്ലാതെ പ്രവര്‍ത്തിക്കല്‍ എന്നീ ക്രമക്കേടുകള്‍ കണ്ടെത്തിയ സ്ഥാപനങ്ങള്‍ക്കാണ് നോട്ടിസ് നല്‍കിയത്.
വൃത്തിഹീനമായ ചുറ്റുപാടുകളില്‍ ഭക്ഷണം പാകല്‍ ചെയ്യല്‍ കണ്ടെത്തിയ ഹോട്ടല്‍ അധികൃതര്‍ അടപ്പിക്കുകയും ചെയ്തു.വീഴ്ച വരുത്തിയ സ്ഥാപനങ്ങള്‍ക്ക് നിശ്ചിത ദിവസങ്ങള്‍ക്കുള്ളില്‍ വീഴ്ചകള്‍ പരിഹരിക്കാന്‍ കര്‍ശന നിര്‍ദ്ദേശവും നല്‍കി.
ഗ്രാമപഞ്ചായത്തിലെ മുഴുവന്‍ സ്ഥാപനങ്ങളും ലൈസന്‍സ് എടുക്കണമന്നും ലൈസന്‍സ് ഇല്ലാതെ പ്രവര്‍ത്തിക്കുന്ന സ്ഥാപങ്ങള്‍ക്കെതിരേയും വൃത്തിഹീനമായ സാഹചര്യത്തില്‍ പ്രവര്‍ത്തിക്കുന്ന സ്ഥാനങ്ങള്‍ക്കെതിരേയും കര്‍ശന നടപടികള്‍ സ്വീകരിക്കുമെന്ന് ഹെല്‍ത്ത് ഇന്‍സ്‌പെക്ടര്‍ അറിയിച്ചു.
ഹെല്‍ത്ത് ഇന്‍്‌പെക്ടര്‍ വി.റോയ് ജേക്കപ്പ്, ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരായ എസ്.ശരത്കുമാര്‍, എം.എസ് ബിനോജ്, പി.വി സുനില്‍കുമാര്‍, എ.ജെ ബിനോയ് എന്നിവര്‍ പരിശോധനകള്‍ക്ക് നേതൃത്വം നല്‍കി.