ദമാം: കേരള സർക്കാർ അണ്ടർ സെക്രട്ടറിയായി വിരമിച്ച നിലമ്പുർ നറുക്കര സ്വദേശി കേശവൻ (73) ദമാമിൽ മരണപ്പെട്ടു. കൊവിഡ് വൈറസ് ബാധയേറ്റാണ് മരണം. കിഴക്കൻ സഊദിയിലെ മകൻ ശ്രീജിത്തിനൊപ്പം അവധിക്കാലം ആഘോഷിക്കാൻ ഭാര്യ ജയശ്രീക്കൊപ്പം മാസങ്ങൾക്ക്​ മുമ്പ്​ എത്തിയ കേശവനെ രണ്ട്​ ദിവസം മുമ്പാണ്​ കടുത്ത ശ്വാസ തടസ്സത്തെ തുടർന്ന് ദമാം സെൻട്രൽ ആശുപത്രിയിൽ പ്രവേശിപ്പിച്ചത്​.

     മുൻ മുഖ്യമന്ത്രി സി.എച്ച്​. മുഹമ്മദ്​ കോയ ഉൾപ്പെടെ വിവിധ മന്ത്രിമാരുടെ അഡീഷണൽ സിക്രട്ടറിയായി പ്രവർത്തിച്ചിട്ടുള്ള ഇദ്ദേഹം നിലമ്പുർ സ്വദേശിയാണങ്കിലും ദീർഘകാലമായി തിരുവനന്തപുരം വഴുതക്കാട്​ ഈശ്വരവിലാസം റോഡിലായിരുന്നു​ താമസം. സി.എച്ച്​. മുഹമ്മദ്​ കോയ വിദ്യാഭ്യാസ മന്ത്രിയായിരുന്ന കാലത്ത് അദ്ദേഹത്തിന്റെ കഴിവ് ബോധ്യപെട്ട് അഡീഷണൽ സെക്രട്ടറിയായി ഉയർത്തുകയായിരുന്നു. പിന്നീട് ആര്യാടൻ മുഹമ്മദ്​ വൈദ്യുത വകുപ്പ്​ മന്ത്രിയായപ്പോഴും, എം.എം. ഹസൻ നോർക്ക വകുപ്പ്​ മന്ത്രിയായപ്പോഴും കേശവൻ കൂടെ ഉണ്ടായിരുന്നു.

      ദമാമിൽ മൃതദേഹം സംസ്​കരിക്കുന്നതിനുള്ള നടപടിക്രമങ്ങൾ സാമൂഹിക പ്രവർത്തകൻ ഷാജി വയനാടിന്റെ നേതൃത്വത്തിൽ പുരോഗമിക്കുന്നു. മറ്റൊരു മകൻ ​ശ്രീകേഷ്​ അമേരിക്കയിലാണ്​.