കോട്ടയം: കാര്‍ ഒഴുക്കില്‍പെട്ട് ടാക്‌സി ഡ്രൈവറായ യുവാവ് മരിച്ചു. മണര്‍കാട്-ഏറ്റുമാനൂര്‍ ബൈപ്പാസില്‍ നാലുമണിക്കാറ്റിലാണ് കാര്‍ ഒഴുക്കില്‍പ്പെട്ടത്.  അങ്കമാലി മഞ്ഞപ്ര അമരാപുരം ആട്ടോക്കാരനില്‍ പരേതനായ ജോയിയുടെ മകന്‍ ജസ്റ്റില്‍ (26) ആണു മരിച്ചത്. നെടുമ്പാശ്ശേരിയില്‍ നിന്നും മല്ലപ്പള്ളിയിലേക്ക് പോയി തിരികെ മടങ്ങുന്നതിനിടെയാണ് അപകടം. ഇന്നലെ പുലര്‍ച്ചെ ഒന്നോടെ മണര്‍കാട് പാലമുറി ഷാപ്പിനു സമീപമാണു അപകടത്തില്‍പ്പെട്ടത്. വെള്ളം കയറിയ സ്ഥലത്ത് എത്തിയപ്പോള്‍ ജസ്റ്റിന്‍ ഓടിച്ചിരുന്ന കാര്‍ നിന്നു പോയി. ഹാന്‍ഡ് ബ്രേക്ക് ഇട്ടതിനുശേഷം കാറിനുള്ളില്‍ നിന്നും ആര്‍.സി ബുക്കും മറ്റും എടുത്ത് ജസ്റ്റിന്‍ സമീപത്തെ വീട്ടിലെത്തി. തുടര്‍ന്ന് ഏറ്റുമാനൂരില്‍ നിന്നും ക്രെയിന്‍ സര്‍വീസുകാരെ വിളിച്ചുവരുത്തുകയും സമീപത്തെ വീട്ടില്‍ നിന്നും കയറുമായി എത്തിയ ജസ്റ്റിന്‍ ക്രെയിനില്‍ കെട്ടി കാര്‍ വലിച്ചു നീക്കാന്‍ ശ്രമിച്ചു. ഇതിനിടെ കയര്‍ പൊട്ടി. വീണ്ടും കയര്‍ കെട്ടുന്നതിനായി ജസ്റ്റിന്‍ കാറിന്റെ അടുത്ത് എത്തുകയും, കാറിനുള്ളിലേക്കു കയറിയ ജസ്റ്റിന്‍ ഡോര്‍ തുറന്നു ഹാന്‍ഡ് ബ്രേക്ക് നീക്കം ചെയ്തതോടെ കാര്‍  വെള്ളൂര്‍ തോട്ടിലേക്ക് ഒഴുകി പോകുകയിരുന്നു. മണിക്കൂറുകളോളം നടത്തിയ തെരച്ചിലിനൊടുവില്‍ സമീപത്തെ പാടശേഖരത്ത് നിന്നാണ് ജസ്റ്റിനെയും കാറും കണ്ടെടുത്തത്.