ബര്‍ലിന്‍: ജര്‍മനിയില്‍ ട്രെയിനില്‍ യുവാവ് നടത്തിയ കോടാലി ആക്രമണത്തില്‍ നാലു പേര്‍ക്കു പരുക്കേറ്റു. സംഭവത്തില്‍ 17കാരനായ അഫ്ഗാന്‍ പൗരനെ പൊലിസ് വെടിവച്ചുകൊന്നു. ജര്‍മനിയിലെ അഭയാര്‍ഥി ക്യാംപിലുണ്ടായിരുന്ന ഇയാള്‍ക്ക് ഐ.എസ് ബന്ധമുള്ളതായി സംശയിക്കുന്നു. ഇയാള്‍ താമസിച്ചിരുന്ന വീട്ടില്‍ നിന്നു ഐ.എസ് പതാക കണ്ടെടുത്തതായി പൊലിസ് അറിയിച്ചു.

വെസ്ബര്‍ഗില്‍ തിങ്കളാഴ്ച വൈകിട്ടായിരുന്നു ആക്രമണം. ട്രെയിനില്‍ മുദ്രാവാക്യം മുഴക്കിയ ഇയാള്‍ കോടാലി ഉപയോഗിച്ചു തലങ്ങും വിലങ്ങും അക്രമിക്കുകയായിരുന്നു. ഫ്രാന്‍സില്‍ ആളുകള്‍ക്കിടയിലേക്കു ട്രക്ക് ഓടിച്ചുകയറ്റി 84 പേരെ കൊന്ന സംഭവം അരങ്ങേറി ദിവസങ്ങള്‍ക്കകമാണ് ജര്‍മനിയിലും ഭീകരാക്രമണം. തങ്ങളുടെ പോരാളിയാണ് ആക്രമണം നടത്തിയതെന്നു ഐ.എസ് പ്രസ്താവിച്ചിട്ടുണ്ട്.

ട്രെച്‌ലിങ്കണില്‍ നിന്നു വസ്ബര്‍ഗിലേക്കുള്ള ട്രെയിനിലാണ് ആക്രമണം നടന്നത്. യുവാവ് കോടാലിയും കത്തിയും കൊണ്ട് പരാക്രമം നടത്തുകയായിരുന്നു. ഹോങ്കോങ്ങില്‍ നിന്നുള്ള നാലു പേര്‍ക്കാണ് ആക്രമണത്തില്‍ പരുക്കേറ്റത്. ഇതില്‍ രണ്ടു പേരുടെ നില ഗുരുതരമാണ്. അതേസമയം, ആക്രമണം നടത്തിയ യുവാവിന്റെ താമസ സ്ഥലത്തു നിന്ന് ഐ.എസ് പതാക കണ്ടെടുത്തതായി ജര്‍മന്‍ ആഭ്യന്തര മന്ത്രി ജോക്കിം ഹെര്‍മന്‍ ആണ് അറിയിച്ചത്. എന്നാല്‍ ഇയാള്‍ ഐ.എസ് പോരാളിയാണെന്നതിനു കൂടുതല്‍ തെളിവുകളൊന്നും ലഭിച്ചിട്ടില്ലെന്നും അദ്ദേഹം പറഞ്ഞു.