കോട്ടയം: പക തീര്‍ക്കുന്നതിനും വ്യക്തിപരമായ നേട്ടങ്ങള്‍ക്കും വേണ്ടി വനിതാ കമ്മിഷന്റെ വേദിയും സംവിധാനവും ദുരുപയോഗം ചെയ്യുന്ന പ്രവണത വര്‍ധിക്കുന്നതായി വനിതാ കമ്മിഷനംഗം ഡോ. ജെ. പ്രമീളാദേവി.
ഇത്തരം സംഭവങ്ങള്‍ കമ്മിഷന്റെ ശ്രദ്ധയില്‍പ്പെട്ടിട്ടുണ്ടെന്നും വ്യാജ പരാതികളുമായി എത്തുന്നവര്‍ക്കെതിരേ കര്‍ശന നടപടി സ്വീകരിക്കുമെന്നും കലക്റ്ററേറ്റ് കോണ്‍ഫറന്‍സ് ഹാളില്‍ നടന്ന സിറ്റിംഗിനിടെ അവര്‍ പറഞ്ഞു. പള്ളിയില്‍ കുശിനി പണി ചെയ്യുന്ന ഒരു സ്ത്രീ എട്ടുപേര്‍ തന്നെ അധിക്ഷേപിച്ചതായി ആരോപിച്ച് നല്‍കിയ പരാതിയില്‍ ഒരാളുടെ പേര് മാത്രം സൂചിപ്പിച്ചിട്ടുള്ളതിനെപ്പറ്റി തിരക്കിയപ്പോള്‍ താനല്ല പരാതി തയാറാക്കിയതെന്നാണ് പരാതിക്കാരി വെളിപ്പെടുത്തിയത്.
പരാതി സംബന്ധിച്ച് കൂടുതല്‍ വിവരം നല്‍കാനും അവര്‍ തയാറായില്ല.  സ്‌കൂട്ടറിടിച്ച് പരുക്കേറ്റ വിദ്യാര്‍ഥിയെ അധ്യാപകര്‍ ആശുപത്രിയിലെത്തിച്ചെങ്കിലും മതിയായ ചികിത്സ നല്‍കാന്‍  അധ്യാപകര്‍ നടപടി എടുത്തില്ലെന്ന് ചൂണ്ടിക്കാട്ടി കുട്ടിയുടെ അമ്മ നല്‍കിയ പരാതിയിലും സമാന രീതിയിലാണ്. പരാതിയില്‍ പറഞ്ഞിരിക്കുന്ന അധ്യാപകരല്ല മറ്റൊരു അധ്യാപകനെതിരേയാണ് പരാതിയെന്നും അയാളുടെ പേര് അറിയാത്തതിനാലാണ് മറ്റു അധ്യാപകരുടെ പേര് പരാതിയില്‍ കാണിച്ചതെന്നുമാണ് സ്ത്രീ വെളിപ്പെടുത്തിയത്.  അദാലത്തില്‍ പരിഗണിച്ച 63 പരാതികളില്‍ 28 എണ്ണം തീര്‍പ്പാക്കി. എട്ട് കേസുകള്‍ പൊലിസിന്റെയും ആറെണ്ണം ആര്‍.ഡി.ഒയുടെയും റിപ്പോര്‍ട്ടിനായി അയച്ചു. 21 കേസുകള്‍ അടുത്ത അദാലത്തിലേക്ക് മാറ്റി.