ബി.ജെ.പി നേതാവിനെ വധിക്കാന്‍ ഛോട്ടാ ഷക്കീല്‍ അയച്ചയാളാണ് പിടിയിലായതെന്ന് അവകാശവാദം
അഹമ്മദാബാദ്: അധോലോക നായകന്‍ ഛോട്ടാ ഷക്കീലിന്റെ സഹായിയെ അറസ്റ്റ് ചെയ്‌തെന്ന് ഗുജറാത്ത് പൊലിസ്. സംസ്ഥാനത്തെ ഒരു ബി.ജെ.പി നേതാവിനെ വധിക്കാന്‍ ഛോട്ടാ ഷക്കീല്‍ അയച്ചയാളെയാണ് പിടികൂടിയതെന്നാണ് ഗുജറാത്ത് പൊലിസിന്റെ ഭീകരവിരുദ്ധ സംഘം വ്യക്തമാക്കിയത്.
അഹമ്മദാബാദിലെ ഹോട്ടലില്‍നിന്നാണ് പ്രതിയെ അറസ്റ്റ് ചെയ്തതെന്നും പിടികൂടാനെത്തിയ സമയത്ത് ഉദ്യോഗസ്ഥര്‍ക്കുനേരെ പ്രതി വെടിവയ്പ് നടത്തിയെന്നും അന്വേഷണ സംഘം വ്യക്തമാക്കി. എന്നാല്‍, സംഭവത്തില്‍ ആര്‍ക്കും പരുക്കേറ്റിട്ടില്ല.
കഴിഞ്ഞ ദിവസം രാത്രിയായിരുന്നു സംഭവം. പ്രതിയില്‍നിന്നു രണ്ടു തോക്കുകളടക്കം പിടികൂടിയതായി വ്യക്തമാക്കിയ പൊലിസ്, ഇയാളുടെ പേരുവിവരങ്ങള്‍ പുറത്തുവിട്ടിട്ടില്ല. മുംബൈ സ്വദേശിയാണ് കസ്റ്റഡിയിലുള്ളതെന്നാണ് ഹോട്ടല്‍ അധികൃതര്‍ വ്യക്തമാക്കുന്നത്.
ഗര്‍ സോമനാഥ് ജില്ലയിലെ ബി.ജെ.പി നേതാവായ ഗോര്‍ദാന്‍ സദാഫിയയെ വധിക്കാനാണ് ഇയാള്‍ എത്തിയതെന്നും വിവരമുണ്ട്. സദാഫിയ തന്നെയാണ് ഇക്കാര്യം അവകാശപ്പെട്ടത്.