തൃശൂര്‍ പൂരത്തിന്റെ സുഗമമായി നടത്തിപ്പിന് താനുള്‍പ്പെടെ മൂന്ന് മന്ത്രിമാരെ സര്‍ക്കാര്‍ ചുമതലപ്പെടുത്തിയിട്ടുണ്ടെന്നും സുനില്‍കുമാര്‍
തൃശൂര്‍: തൃശൂര്‍ പൂരത്തിന് വെടിക്കെട്ട് അടക്കമുള്ള ചടങ്ങുകള്‍ നിയമ പ്രകാരം നടത്താന്‍ വേണ്ട എല്ലാ കാര്യങ്ങളും സര്‍ക്കാര്‍ ചെയ്തിട്ടുണ്ടെന്ന് മന്ത്രി വി എസ് സുനില്‍കുമാര്‍ പറഞ്ഞു. തൃശൂര്‍ പൂരത്തിന്റെ കാര്യത്തില്‍ പ്രത്യേക രാഷ്ട്രീയമില്ലെന്നും എല്ലാവരും ഒറ്റക്കെട്ടായി നിന്ന് കാര്യങ്ങള്‍ നേടിയെടുക്കാന്‍ പ്രയത്‌നിക്കണമെന്നും മന്ത്രി അഭിപ്രായപ്പെട്ടു. തൃശൂര്‍ പൂരം നടത്തിപ്പില്‍ നിന്ന് സംസ്ഥാന സര്‍ക്കാര്‍ ഓടിയൊളിക്കുകയാണെന്ന ബി.ജെ.പി നേതാക്കളുടെ പ്രസ്താവന അടിസ്ഥാന രഹിതവും ശുദ്ധ അസംബന്ധവുമാണെന്ന് മന്ത്രി പറഞ്ഞു.  
ഇക്കാര്യത്തില്‍ അനാവശ്യമായ വിവാദങ്ങള്‍ ഉണ്ടാകേണ്ട ആവശ്യമില്ല. തൃശൂര്‍ പൂരത്തിന്റെ സുഗമമായി നടത്തിപ്പിന് താനുള്‍പ്പെടെ മൂന്ന് മന്ത്രിമാരെ സര്‍ക്കാര്‍ ചുമതലപ്പെടുത്തിയിട്ടുണ്ടെന്നും സുനില്‍കുമാര്‍ പറഞ്ഞു. അതേസമയം തൃശൂര്‍ പൂരത്തിന്റെ പരമ്പരാഗത വെടിക്കെട്ടിന് തടസമുണ്ടാക്കാന്‍ കേന്ദ്ര സര്‍ക്കാരിന്റെ ഭാഗത്ത് നിന്ന് യാതൊരു നടപടിയും ഉണ്ടായിട്ടില്ലെന്ന് നിര്‍മ്മലാ സീതാരാമന്‍ ഡല്‍ഹിയില്‍ അറിയിച്ചു.