നന്തിബസാര്‍: നന്തി പ്രദേശത്ത് അഞ്ചു വീടുകളില്‍ മോഷണം. മൂന്നു വീടുകളില്‍ നിന്നായി പതിമൂന്നര പവന്‍ നഷ്ടപ്പെട്ടു. പള്ളിക്കര റോഡിലെ അറഫ പി.വി മഹ്മൂദ് ഹാജിയുടെ വീട്ടില്‍ കഴിഞ്ഞദിവസം രാത്രി ഒന്നിനുശേഷം നടന്ന കവര്‍ച്ചയില്‍ മുറിയില്‍നിന്ന് ആറര പവന്‍ മോഷ്ടിക്കുകയായിരുന്നു. കമ്പിപ്പാര ഉപയോഗിച്ചു വീടിന് പിന്നിലെ വാതില്‍ തകര്‍ത്താണ് മോഷ്ടാക്കള്‍ അകത്തു കയറിയത്.
പരത്തിക്കണ്ടികുനി അബൂബക്കറിന്റെ വീട്ടില്‍ നിന്ന് നാലര പവനും പറമ്പത്ത് ബാബുവിന്റെ വീട്ടില്‍ നിന്ന് രണ്ടര പവനും മോഷണം പോയി. കണ്ടച്ചോത്ത് സത്യന്‍, സന്തോഷ് എന്നിവരുടെ വീടുകളില്‍ മോഷണശ്രമം നടന്നുവെങ്കിലും വീട്ടുകാര്‍ ഉണര്‍ന്നപ്പോഴേക്കും മോഷ്ടാക്കള്‍ ഓടി രക്ഷപ്പെടുകയായിരുന്നു.