കൊച്ചി: കൊച്ചി മെട്രോ റെയില്‍ പദ്ധതിയുടെ അന്തിമ അനുമതിക്കായുള്ള സുരക്ഷാ പരിശോധന ഇന്ന് നടക്കും. മെട്രോ റെയില്‍ സേഫ്റ്റി കമ്മിഷണറുടെ നേതൃത്വത്തിലുളള സംഘമാണ് മൂന്ന ദിവസം നീളുന്ന പരിശോധന നടത്തുക. പരിശോധനയില്‍ അനുമതി കിട്ടിയാല്‍ മാത്രമേ മെട്രോയ്ക്ക് ഓടിത്തുടങ്ങാനാവുകയുള്ളു.

മെട്രോ സ്റ്റേഷനിലൊരുക്കിയിരിക്കുന്ന സൗകര്യങ്ങളുടെ വൃത്തിയും ഗുണനിലവാരവും സംഘം പരിശോധിക്കും. കമ്മ്യൂണിക്കേഷന്‍ സംവിധാനം, ഓപ്പറേഷന് കണ്‍ട്രോള്‍ സെന്ററിലെ സൗകര്യങ്ങള്‍ എന്നിവയും പരിശോധിക്കും.

സുരക്ഷാ പരിശോധനക്ക് വേണ്ടി 11 സ്‌റ്റേഷനുകളില്‍ എല്ലാ ഒരുക്കങ്ങളും പൂര്‍ത്തിയായി കഴിഞ്ഞു.കണ്‍ട്രോളിങ് റൂം, ടിക്കറ്റ് സംവിധാനം, അന്വേഷണ വിഭാഗം, സ്‌റ്റേഷന്‍ തുടങ്ങി എല്ലാം ട്രാക്കിലായിക്കഴിഞ്ഞു.

ആലുവ മുതല്‍ പാലാരിവട്ടം വരെയാണ് ആദ്യ ഘട്ട സര്‍വീസ്. പരിശോധന പൂര്‍ത്തിയായാല്‍ 13 കിലോമീറ്റര്‍ ദൂരം തുടര്‍ച്ചയായി ട്രയല്‍ സര്‍വീസ് തുടങ്ങും.