കാസര്‍കോട്: രാഷ്ട്രീയ നിലപാടിന്റെ പേരില്‍ മുഖ്യമന്ത്രി സ്ഥാനം വലിച്ചെറിഞ്ഞ പാരമ്പര്യമാണ് സി.പി.ഐക്കുള്ളതെന്ന്  ദേശീയ സെക്രട്ടറിയേറ്റംഗം പന്ന്യന്‍ രവീന്ദ്രന്‍. സി.പി.ഐ നേതാവ് ഇ.കെ മാസ്റ്റര്‍ അനുസ്മരണ സമ്മേളനം കോളിയടുക്കത്ത് ഉദ്ഘാടനം ചെയ്യുകയായിരുന്നു അദ്ദേഹം. കൈയേറ്റക്കാര്യത്തില്‍ പാര്‍ട്ടിക്കു വ്യക്തമായ നിലപാടുണ്ട്. ടാറ്റ കൈയേറിയ പതിനായിരക്കണക്കിന് ഏക്കര്‍ ഭൂമി ഒഴിപ്പിച്ചത് അച്യുതമേനോന്‍ സര്‍ക്കാരാണ്. സി.പി.ഐ രാഷ്ട്രീയ വിഷയങ്ങളില്‍ തര്‍ക്കിക്കുന്നത് മുന്നണി വിട്ടുപോകാനല്ലെന്നും മുന്നണിയെ ശക്തിപ്പെടുത്താനാെണന്നും അദ്ദേഹം പറഞ്ഞു. സത്യസന്ധതയും സാമ്പത്തിക അച്ചടക്കവും ജീവിത ലാളിത്യവുമായിരുന്നു ഇ.കെ മാസ്റ്ററുടെ മുഖമുദ്രയെന്നും അദ്ദേഹം കൂട്ടിച്ചേര്‍ത്തു.
സംസ്ഥാന കൗണ്‍സിലംഗം ടി. കൃഷ്ണന്‍ അധ്യക്ഷനായി. ഗോവിന്ദന്‍ പള്ളിക്കാപ്പില്‍, വി. രാജന്‍, വി. സുരേഷ് ബാബു സംസാരിച്ചു.