തുറവൂര്‍: ദേശീയപാതയില്‍ പുത്തന്‍ചന്ത പെട്രോള്‍ പമ്പിന് സമീപം വന്‍തോതില്‍ മാലിന്യം തള്ളുന്നത് പതിവാകുന്നു. കാല്‍നട യാത്രികര്‍ക്കും വാഹന യാത്രികര്‍ക്കും മൂക്കു പൊത്താതെ ഇതുവഴി കടന്നുപോകാന്‍ കഴിയാത്ത ദയനിയ സ്ഥിതിയാണ്.
ദിനംപ്രതി ഇവിടെ മാലിന്യങ്ങള്‍ തള്ളുന്നതുമൂലം പ്രദേശമാകെ അതിരൂക്ഷമായ ദുര്‍ഗന്ധമാണ് വമിക്കുന്നത്.
കൂടാതെ പകര്‍ച്ചവ്യാധി ഉള്‍പ്പെടെയുള്ള രോഗങ്ങള്‍ പടരാന്‍ സാധ്യതയുള്ളതായും നാട്ടുകാര്‍ പറയുന്നു.
കഴിഞ്ഞ ദിവസം 25 ചാക്കുകളിലാണ് ഇറച്ചിക്കടകളില്‍ നിന്നുള്ള മാലിന്യങ്ങള്‍ കൊണ്ട് വന്ന് തള്ളിയത്. കുറ്റിക്കാടുകള്‍ നിറഞ്ഞ പ്രദേശമായതിനാല്‍ മാലിന്യങ്ങള്‍ ആരും ശ്രദ്ധിക്കപ്പെടാറില്ല.
ചാക്കുകളിലെ മാലിന്യങ്ങള്‍ കാക്ക കൊത്തിപ്പറിച്ച് സമീപവാസികളുടെ വീടുകളുടേയും കടകളുടേയും മുകളിലിടുന്നത് മൂലം വളരെ ബുദ്ധിമുട്ടുകള്‍ സൃഷ്ടിക്കുന്നുണ്ട്.
കൂടാതെ തെരുവുനായ്ക്കളുടെ ശല്യവും വര്‍ധിക്കുകയാണ്. മാലിന്യങ്ങള്‍ തള്ളുന്നവര്‍ക്കെതിരെ നടപടി സ്വീകരിക്കാന്‍ അധികൃതര്‍ തയ്യാറാകാത്തതാണ് ഇത് വര്‍ധിക്കാന്‍ കാരണമെന്ന് നാട്ടുകാര്‍ പറഞ്ഞു.
ദേശീയ പാതയില്‍ പൊലിസ് പട്രോളിങ് ശക്തമാക്കണമെന്ന ജനകീയാവശ്യം ശക്തമായി.