ഡല്‍ഹി: കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ തെരഞ്ഞെടുപ്പ് വാഗ്ദാനങ്ങള്‍ പ്രഖ്യാപിച്ച് സംസാരിച്ചതിനെതിരേ പ്രധാനമന്ത്രി നരേന്ദ്രമോദി നടത്തിയ പരാമര്‍ശം രാഷ്ട്രീയ വാഗ്വാദങ്ങള്‍ക്ക് തിരികൊളുത്തി. കോണ്‍ഗ്രസ് ഭരിക്കുന്ന സംസ്ഥാനങ്ങളിലെല്ലാം വാഗ്ദാനങ്ങള്‍ പാലിക്കാന്‍ പഴയ പാര്‍ട്ടി പാടുപെടുകയാണെന്ന് മോദി തുടര്‍ച്ചയായി ട്വീറ്റുകളിലൂടെ കോണ്‍ഗ്രസിനെതിരേ ആഞ്ഞടിച്ചിരുന്നു.

എന്നാല്‍ അതിനു മറുപടിയുമായി രംഗത്തെത്തിയിരിക്കുകയാണ് കോണ്‍ഗ്രസ് അധ്യക്ഷനായ ഖാര്‍ഗെ.  ബിജെപിയിലെ 'ബി' എന്നത് വഞ്ചനയെയും 'ജെ' എന്നത് ജുംല (ശൂന്യമായ വാഗ്ദാനങ്ങള്‍)യുമാണ് സൂചിപ്പിക്കുന്നതെന്നും ഖാര്‍ഗെ പരിഹസിച്ചു. കര്‍ണാടകയില്‍ കോണ്‍ഗ്രസ് നല്‍കിയ വാഗ്ദാനങ്ങള്‍ പരാജയപ്പെട്ടെന്നുള്ള മോദിയുടെ പ്രസ്താവനയ്‌ക്കെതിരേയായിരുന്നു ഖാര്‍ഗെ ആഞ്ഞടിച്ചത്. നുണ, വഞ്ചന, കൊള്ള, പരസ്യം എന്നിവയാണ് ബിജെപി സര്‍ക്കാരിനെ നിര്‍വചിക്കുന്ന വിശേഷണങ്ങളെന്നാണ് ഖാര്‍ഗെ പറഞ്ഞത്.

എന്‍ഡിഎയുടെ 100 ദിന പദ്ധതിയെ വിലകുറഞ്ഞ പിആര്‍ സ്റ്റണ്ട് എന്നും അദ്ദേഹം വിശേഷിപ്പിച്ചു.മാത്രമല്ല തെരഞ്ഞെടുപ്പിന് മുമ്പ് നല്‍കിയ വാഗ്ദാനങ്ങള്‍ പാലിക്കുന്നതില്‍ മോദി സര്‍ക്കാര്‍ ഏഴുതവണയും പരാജയപ്പെട്ടെന്നും അദ്ദേഹം ചൂണ്ടിക്കാട്ടി. കോണ്‍ഗ്രസ് ഭരിക്കുന്ന കര്‍ണാടക, തെലങ്കാന, ഹിമാചല്‍പ്രദേശ് എന്നീ സംസ്ഥാനങ്ങള്‍ സാമ്പത്തിക പ്രതിസന്ധിയിലാണെന്ന് മോദി പറഞ്ഞിരുന്നു.