ചെറുതുരുത്തി: വള്ളത്തോള്‍ നഗര്‍ പഞ്ചായത്തിലെ പുതുശ്ശേരി മിത്രാനന്ദപുരത്ത് തെരുവ് നായ്ക്കളുടെ ആക്രമണം യുവാവിനും, വയോധികയ്ക്കും സാരമായി പരുക്കേറ്റു.
ഏതാനും വളര്‍ത്ത് മൃഗങ്ങളേയും നായ കടിച്ച് പരുക്കേല്‍പ്പിച്ചു. മിത്രാനന്ദപുരം തൈക്കാട് തൊടി വീട്ടില്‍ സുനില്‍ കുമാര്‍(34), വടക്കേ മണ്ഡല  വീട്ടില്‍ സരസ്വതി (58) എന്നിവര്‍ക്കാണ് കടിയേറ്റത്.  ഇവരെ മുളങ്കുന്നത്ത് കാവ് മെഡിയ്ക്കല്‍ കോളജ് ആശുപ ത്രിയില്‍ പ്രവേശിപ്പിച്ച് ചികിത്സ നല്‍കി.  ഭാരതപുഴയിലെ മിത്രാനന്ദപുരം കടവില്‍ കുളിച്ച്  മടങ്ങുകയായിരുന്ന സുനില്‍ കുമാറിനെ  നായ ഓടിച്ചിട്ട് കടിക്കുകയായിരുന്നു. യുവാവിന്റെ പുറത്താണ് കടിയേറ്റത് ഇതിന് ശേഷം സരസ്വതിയുടെ വീട്ടിലേയ്ക്ക്  ഓടികയറുകയും കടിക്കുകയുമായിരുന്നു.തുടര്‍ന്ന്  മേഖലയില്‍ വിഹരിച്ച നായ കുണ്ടില്‍ ചന്ദ്രന്റെ പശുക്കളേയും കടിച്ച് പരുക്കേല്‍പ്പിച്ചു. പഞ്ചായത്ത് പ്രസിഡന്റ് പി.പത്മജ സ്ഥലത്തെത്തി. നായ് നിര്‍മ്മാര്‍ജനത്തിന് നടപടിയുണ്ടാകുമെന്ന് പ്രസിഡന്റ്് അറിയിച്ചു.