ശ്രീനഗര്‍: ജമ്മുകശ്മിരിലെ ദോഡ ജില്ലയില്‍ യാത്രക്കാരുമായി പോവുകയായിരുന്ന വാനിനുമുകളിലേക്ക് മഞ്ഞുമലയിടിഞ്ഞു വീണ് അഞ്ചുപേര്‍ മരിച്ചു. ബാനി പട്ടണത്തില്‍ നിന്ന് ബദേര്‍വായിലേക്ക് യാത്രക്കാരുമായി പോവുകയായിരുന്ന വാനാണ് മഞ്ഞിടിച്ചിലില്‍ അകപ്പെട്ടത്.
അപകടത്തില്‍പ്പെട്ട മൂന്നുപേരെ രക്ഷാപ്രവര്‍ത്തകര്‍ പരുക്കുകളോടെ പുറത്തെടുത്തതായി പൊലിസ് അറിയിച്ചു.
ഈ വര്‍ഷം ജനുവരി 25ന് ബന്ദിപ്പോറയില്‍ മഞ്ഞിടിച്ചിലില്‍ 14 സൈനികരെയാണ് കാണാതായത്. മൂന്ന് ദിവസം കഴിഞ്ഞ് ഇവരില്‍ അഞ്ചു സൈനികരെ മഞ്ഞിനടിയില്‍ നിന്ന് കണ്ടെടുക്കാനായി. കഴിഞ്ഞ മാസം കശ്മിരിലെ ബട്ടാലിക് മേഖലയില്‍ മഞ്ഞിടിച്ചിലില്‍ മൂന്ന് സൈനികരാണ് മരിച്ചത്. തുടര്‍ച്ചയായ മഴയും മഞ്ഞിടിച്ചിലും കാരണം ബട്ടാലിക് മേഖലയില്‍ ഗതാഗതം ദുഷ്‌കരമായിരിക്കുകയാണ്.