റിയാദ്: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ ആദ്യ വിദേശ സന്ദര്‍ശനം സഊദിയിലേക്ക്. 23ന് അദ്ദേഹം സഊദി അറേബ്യ സന്ദര്‍ശിക്കുമെന്ന് വൈറ്റ് ഹൗസിനെ ഉദ്ധരിച്ച് വിദേശ മാധ്യമങ്ങള്‍ റിപ്പോര്‍ട്ട് ചെയ്തു. സഊദിയിലെത്തുന്ന അമേരിക്കന്‍ പ്രസിഡന്റ് സഊദി ഭരണാധികാരിയുമായും ജി.സി.സി, അറബ് നേതാക്കളുമായും കൂടിക്കാഴ്ച്ച നടത്തും.
ഐ.എസിനെതിരായ യുദ്ധവും മേഖലയില്‍ ഇറാന്‍ വിരുദ്ധ ചേരി രൂപപ്പെടുത്തലും മധ്യേഷ്യന്‍ സമാധാനവുമായിരിക്കും സന്ദര്‍ശനത്തിന്റെ ലക്ഷ്യമെന്ന് സഊദി മാധ്യമങ്ങള്‍ റിപ്പോര്‍ട്ട് ചെയ്തു. ഇറാനെതിരേ ശക്തമായ നീക്കങ്ങള്‍ നടത്താനായി അറബ് രാജ്യങ്ങളുടെ പിന്തുണ ഉറപ്പിക്കുകയാണ് സന്ദര്‍ശനത്തിന്റെ മുഖ്യ ലക്ഷ്യം.
സഊദി അറേബ്യയില്‍ നിന്നും ഇസ്രാഈലിലേക്ക് പോകുന്ന ട്രംപ് മേഖലയിലെ സമാധാനത്തിനുള്ള പുതിയ നീക്കത്തിന് തുടക്കംകുറിക്കുമെന്നും നിരീക്ഷകള്‍ വിലയിരുത്തുന്നു. ഫലസ്തീന്‍ പ്രസിഡന്റ് മഹ്മൂദ് അബ്ബാസ് , ഇസ്‌റാഈല്‍ പ്രധാനമന്ത്രി ബെഞ്ചമിന്‍ നെതന്യാഹു എന്നിവരുമായി കൂടിക്കാഴ്ച നടത്തും. തുടര്‍ന്ന് വത്തിക്കാനിലേക്കും തൊട്ടടുത്ത ദിവസം ബ്രസല്‍സില്‍ നടക്കുന്ന നാറ്റോ ഉച്ചകോടിയിലും ഇറ്റലിയിലെ സിസിലിയില്‍ നടക്കുന്ന ജി ഏഴ് ഉച്ചകോടിയിലും അദ്ദേഹം സംബന്ധിക്കും.
മുസ്‌ലിം വിരുദ്ധ നിലപാട് മൂലം ശ്രദ്ധേയനായ ട്രംപിന്റെ പ്രഥമ സന്ദര്‍ശനം തന്നെ പ്രമുഖ അറബ് രാജ്യമായ സഊദി അറേബ്യയിലേക്കാണെന്നത് ഏറെ പ്രാധാന്യത്തോടെയാണ് നിരീക്ഷകര്‍ കാണുന്നത്.