വാടാനപ്പള്ളി : ദുരന്തം ക്രൂര താണ്ഡവമാടിയ ഏങ്ങണ്ടിയൂര്‍ ചേറ്റുവ രണ്ടാം വാര്‍ഡ് പ്രദേശത്തെ ഫക്കീര്‍ സാഹിബ് തങ്ങളുടെ ജാറം പള്ളിയിലെ ദുരിതാശ്വാസ ക്യാമ്പില്‍ താമസിക്കുന്ന ക്യാമ്പിലെ പ്രയംചെന്ന ഉമ്മ പുതുവീട്ടില്‍ കയ്യുവിന് ഗ്രാമപഞ്ചായത്ത് പ്രസിഡന്റ് ഉദയ് തോട്ടപ്പുള്ളി പെരുന്നാള്‍ സമ്മാനമായി പ്രാര്‍ത്ഥന വേഷമായ നമസ്‌ക്കാര കുപ്പായം സമ്മാനിച്ചു.
വാര്‍ഡ് മെംബര്‍ ഇര്‍ഷാദ് കെ.ചേറ്റുവയാണ് ക്യാമ്പില്‍ കഴിയുന്ന ഏറെ പ്രായമായ കയ്യുവിനെ കുറിച്ച് ഗ്രാമപഞ്ചായത്ത് പ്രസിഡന്റിന്റെ ശ്രദ്ധയില്‍പ്പെടുത്തിയത്.
ത്യാഗത്തിന്റെ ബലിപെരുനാള്‍ ദിനം ദുരിതാശ്വാസ ക്യാമ്പുകളില്‍ ചിലവിടുന്ന ദുരിതബാധിതര്‍ക്ക് ഗ്രാമപഞ്ചായത്ത് ഭരണസമിതി ആശംസകള്‍ നേര്‍ന്നു. ഏകമകള്‍ പൂമയോടൊപ്പം ചേറ്റുവ രണ്ടാം വാര്‍ഡിലെ പാണ്ടി പാടം പരിസരത്ത് താമസിക്കുന്ന നിര്‍ദയയായ കയ്യുവിന് വാര്‍ഡ് മെമ്പര്‍ ഇര്‍ഷാദ് കെ.ചേറ്റുവ മുന്‍കയ്യെടുത്ത് ഈ വര്‍ഷം ലൈഫ് പദ്ധതിയിലൂടെ വീട് നിര്‍മിച്ച് നല്‍കാന്‍ തീരുമാനിച്ചിരിക്കയാണ്. വിവിധ ക്ലബ്ബുകളുടെ നേതൃത്വത്തില്‍ ചേറ്റുവയില്‍ വിവിധ കേന്ദ്രങ്ങളില്‍ നടക്കുന്ന ദുരിതാശ്വാസ ക്യാമ്പുകളില്‍ പെരുനാള്‍ ദിനത്തില്‍ വിഭവസമൃദമായി ഭക്ഷണങ്ങളൊരുക്കിയിരുന്നു.
ക്ലബ്ബുകളുടെ നേതൃത്വത്തില്‍ പഞ്ചായത്ത് നിയന്ത്രണത്തിലുള്ള കാമ്പുകളില്‍ മികച്ച സേവനമാണ് ദുരിതബാധിതര്‍ക്ക് നല്‍കുന്നത്. ഏങ്ങണ്ടിയൂര്‍ സര്‍വീസ് സഹകരണ ബാങ്ക് പ്രസിഡന്റ് എം.എ ഹാരിസ് ബാബു, ഗ്രാമ പഞ്ചായത്തംഗങ്ങളായ ഇര്‍ഷാദ് കെ.ചേറ്റുവ, സുമയ്യ സിദ്ധി,, വിവിധ രാഷ്ട്രീയ പാര്‍ട്ടി നേതാക്കള്‍,സന്നദ്ധ സംഘടനകളായ എഫ്.ഏ.സി. ചേറ്റുവ, മഹാത്മ ബ്രദേഴ്‌സ്, മേമന്‍സ് ചേറ്റുവ ,ചലഞ്ചേഴ്‌സ്‌ചേറ്റുവ, ജി.എസ്.എ.സി, ചേറ്റുവ അസോസിയേഷന്‍ എന്നീ സംഘടനകളും പഞ്ചായത്തും സഹകരിച്ചാണ് ക്യാമ്പുകളുടെ പ്രവര്‍ത്തനം നടക്കുന്നത്.