മണ്ണാര്‍ക്കാട്: മണ്ണാര്‍ക്കാട് അന്തര്‍സംസ്ഥാന മോഷ്ടാക്കള്‍ പിടിയിലായി. കാഞ്ഞിരത്ത് തുണിക്കടയില്‍ മോഷണം നടത്തിയ കേസിലാണ് തമിഴ്‌നാട് സ്വദേശികളായ മോഷ്ടാക്കളെ പിടികൂടിയത്.
തമിഴ്‌നാട് വെല്ലൂര്‍ ഗൂഡിയാട്ടം കല്ലൂര്‍ നേരൂര്‍ സ്വദേശികളായ ജലീല്‍ (55),അബ്ബാസ്(35) എന്നിവരെയാണ് മണ്ണാര്‍ക്കാട് പൊലിസ് പിടികൂടിയത്.ആഗസ്ത് ഒന്നിന് പുലര്‍ച്ചെയാണ് കാഞ്ഞിരത്തെ കെ.പി.ടെക്‌സ് ജന്റ്‌സ് റെഡിമെഡിസില്‍ നിന്നും രണ്ടര ലക്ഷം രൂപ വില വരുന്ന തുണിത്തരങ്ങള്‍ മോഷ്ടിച്ചത്.
സംഭവത്തിന്റെ സി.സി.ടി.വി ദൃശ്യങ്ങള്‍ ലഭിച്ചിരുന്നു. തുടര്‍ന്ന് നടത്തിയ അന്വേഷണത്തിലാണ് പ്രതികള്‍ തമിഴ്‌നാട്ടുകാരാണെന്നു മനസ്സിലായത്. വാഹനം വാടകക്കെടുത്തു അടച്ചിട്ട വീടുകളിലും,കടകളിലും മോഷണം നടത്തുന്നവരാണിവര്‍.സംഘത്തിലെ ഒരാളെ കൂടി പിടികൂടാനുണ്ട്.
അറസ്റ്റിലായ ജലീലിനെതിരെ ആന്ധ്രപ്രദേശില്‍ ബാങ്ക് കൊള്ളയുള്‍പ്പെടെ എട്ടോളം കേസുകളുണ്ട്. പിടിയിലായ അബ്ബാസ് മണ്ണാര്‍ക്കാട് നിന്നും കല്യാണം കഴിച്ച് മുണ്ടേക്കാരാട് വാടകക്ക് താമസിക്കുകയായിരുന്നു.
തച്ചമ്പാറയില്‍ വീട് കുത്തി തുറന്നു മോഷണം നടത്തിയ സംഭവവത്തിലും പ്രതികളാണിവര്‍. മണ്ണാര്‍ക്കാട് സി.ഐ.ഫര്‍ഷാദ് ടി.പി, എസ്.ഐ വിപിന്‍ കെ. വേണുഗോപാല്‍, എ.എസ്.ഐ അബ്ദുല്‍ സലാം, എസ്.സി.പി.ഒ സുനില്‍ കുമാര്‍, സി.പി.ഒ മാരായ ഷാഫി, സഹദ്, ദേവസ്യ, ഷമീര്‍ എന്നിവരടങ്ങുന്ന പാലക്കാട് എസ്.പി.ദേബേഷ് കുമാര്‍ ബെഹ്‌റരൂപീകരിച്ച പ്രതേക സംഘമാണ് പ്രതികളെ ആന്ധ്രപ്രദേശിലെ ചിറ്റൂര്‍ പീലേറുവില്‍ നിന്നും പിടികൂടിയത്.