ന്യൂഡല്‍ഹി: പ്രധാനമന്ത്രി നരേന്ദ്രമോദിയുടെ ജീവിതത്തെ ആസ്പദമാക്കിയ സിനിമ പി.എം നരേന്ദ്രമോദി തെരഞ്ഞെപ്പ് അവസാനിക്കുന്ന മെയ് 19ന് മുന്‍പ് റിലീസ് ചെയ്യാന്‍ അനുവദിക്കാനാവില്ലെന്ന് തെരഞ്ഞെടുപ്പ് കമ്മീഷന്‍ സുപ്രിംകോടതിയില്‍. വെറും ആത്മകഥയെന്നതിനപ്പുറം അതില്‍ രാഷ്ട്രീയമുണ്ടെന്നും വ്യക്തിവര്‍ണനയാണെന്നും കമ്മീഷന്‍ ചൂണ്ടിക്കാട്ടി.

ഏപ്രില്‍ 17ന് കമ്മീഷന്‍ അധികൃതര്‍ സിനിമ കണ്ടിരുന്നു. സിനിമ കണ്ട് റിപ്പോര്‍ട്ട് നല്‍കാന്‍ സുപ്രിം കോടതി നിര്‍ദ്ദേശിച്ചത് അനുസരിച്ചായിരുന്നു അത്. ഇപ്പോള്‍ സിനിമ പ്രദര്‍ശിപ്പിക്കുന്നത് തെരഞ്ഞെടുപ്പ് പെരുമാറ്റച്ചട്ട ലംഘനമാവും. മോദിയെ ശരിയുടെ പക്ഷത്ത് നില്‍ക്കുന്നയാളായും പ്രമുഖ പ്രതിപക്ഷ പാര്‍ട്ടിയെ സിനിമയില്‍ അഴിമതിക്കാരായും സിനിമയില്‍ ചിത്രീകരിക്കുന്നുണ്ടെന്നും തെരഞ്ഞെടുപ്പ് കമ്മീഷന്‍ ചൂണ്ടിക്കാട്ടി.