ന്യൂഡല്‍ഹി: ഡല്‍ഹിയില്‍ നിന്നുള്ള ബി.ജെ.പി ലോക്‌സഭാംഗവും ദലിത് നേതാവുമായ ഉദിത് രാജ് ബി.ജെ.പി വിട്ട് കോണ്‍ഗ്രസില്‍ ചേര്‍ന്നു.
ഇന്നലെ രാവിലെ രാഹുല്‍ ഗാന്ധിയെ നേരില്‍ കണ്ടാണ് ഉദിത് കോണ്‍ഗ്രസില്‍ ചേരുന്നതായി പ്രഖ്യാപിച്ചത്. നോത്ത് വെസ്റ്റ് ഡല്‍ഹിയില്‍ നിന്നുള്ള എം.പിയായ ഉദിതിനെ മാറ്റി ബി.ജെ.പി കഴിഞ്ഞ ദിവസം പഞ്ചാബി സംഗീതജ്ഞന്‍ ഹന്‍സ്‌രാജ് ഹന്‍സിനെ സ്ഥാനാര്‍ഥിയായി പ്രഖ്യാപിച്ചിരുന്നു. ഇതില്‍ പ്രതിഷേധിച്ചാണ് അദ്ദേഹം പാര്‍ട്ടി വിട്ടത്.

ബി.ജെ.പിയുടെ നയങ്ങള്‍ക്ക് താനെപ്പോഴും എതിരായിരുന്നുവെന്ന് ഉദിത് രാജ് പാര്‍ട്ടിയില്‍ നിന്ന് രാജിവച്ച ശേഷം മാധ്യമങ്ങളോട് പറഞ്ഞു. രാഹുല്‍ ഗാന്ധിയും അരവിന്ദ് കെജ്‌രിവാളും തനിക്ക് ഇക്കാര്യത്തെ കുറിച്ച് മുന്നറിയിപ്പ് നല്‍കിയിരുന്നതായും ഉദിത് രാജ് കൂട്ടിച്ചേര്‍ത്തു.
ബി.ജെ.പിക്ക് ദലിത് വോട്ടുകള്‍ വേണമെന്നും എന്നാല്‍ ദലിത് സമദായത്തില്‍ നിന്ന് നേതാക്കളെ വേണ്ടെന്നുമാണ് നിലപാട്. കോണ്‍ഗ്രസില്‍ ചേരണമെന്ന് താന്‍ മുമ്പേ തീരുമാനിച്ചിരുന്നുവെന്നും രാഹുല്‍ ഗാന്ധിക്ക് ഇക്കാര്യം അറിയമായിരുന്നുവെന്നും അദ്ദേഹം പറഞ്ഞു.
താന്‍ ടിക്കറ്റിനായി കാത്തിരിക്കുകയാണ്, അത് നല്‍കിയില്ലെങ്കില്‍ പാര്‍ട്ടിയോട് ഗുഡ്‌ബൈ പറയുമെന്ന് ഉദിത് രാജ് ട്വിറ്ററില്‍ കുറിച്ചിരുന്നു. ആംആദ്മി പാര്‍ട്ടിയിലെ രാഖി ബിര്‍ളയെ ഒരു ലക്ഷത്തില്‍പരം വോട്ടുകള്‍ക്കാണ് ഉദിത് രാജ് 2014 ല്‍ പരാജയപ്പെടുത്തിയിരുന്നത്.