ദോഹ: ഖത്തറില്‍ നടക്കുന്ന ഏഷ്യന്‍ അത്‌ലറ്റിക്ക് ചാംപ്യന്‍ഷിപ്പിന്റെ അവസാന ദിനം ഇന്ത്യയുടെ മെഡല്‍ കൊയ്ത്ത്. മലയാളി താരം പി.യു ചിത്രയുടെ സ്വര്‍ണ നേട്ടമായിരുന്നു മേളയില്‍ ഇന്നലെ ഇന്ത്യയുടെ പ്രധാന മെഡല്‍ നേട്ടം. വനിതകളുടെ 1500 മീറ്ററിലായിരുന്നു ചിത്ര സ്വര്‍ണം സ്വന്തമാക്കിയത്. 4.14.56 മിനിറ്റ് കൊണ്ട് ഓട്ടം പൂര്‍ത്തിയാക്കിയാണ് ചിത്ര സ്വര്‍ണം സ്വന്തമാക്കിയത്. പുരുഷന്‍മാരുടെ 1500 മീറ്ററിലും ഇന്ത്യ മെഡല്‍ സ്വന്തമാക്കി. ഈ ഇനത്തില്‍ ഇന്ത്യന്‍ താരം അജയ് കുമാര്‍ വെള്ളിയാണ് ഇന്ത്യക്ക് നേടിക്കൊടുത്തത്. വനിതകളുടെ 200 മീറ്ററില്‍ ദ്യുതി ചന്ദ് വെങ്കലവും സ്വന്തമാക്കി. 23.24 സെക്കന്‍ഡ് കൊണ്ട് ഓട്ടം പൂര്‍ത്തിയാക്കിയാണ് ദ്യുതി വെങ്കലം നേടിയത്. സ്വര്‍ണം കരസ്ഥമാക്കിയ ബഹ്‌റൈന്റെ സല്‍വ നാസര്‍ 22.74 സെക്കന്‍ഡ് കൊണ്ടാണ് ഓട്ടം പൂര്‍ത്തിയാക്കിയത്. വെള്ളി നേടിയ കസാഖിസ്താന്‍ താരം സഫ്രനോവ 22.87 സെക്കന്‍ഡ് കൊണ്ടും ഓട്ടം പൂര്‍ത്തിയാക്കി.

100 മീറ്ററില്‍ മെഡല്‍ പ്രതീക്ഷയുണ്ടായിരുന്ന ദ്യുതിക്ക് മെഡലൊന്നും ലഭിച്ചിരുന്നില്ല. പുരുഷന്‍മാരുടെ 5000 മീറ്ററില്‍ ഇന്ത്യന്‍ താരം മുരളി കുമാര്‍ വെള്ളി നേടി. ഈ ഇനത്തില്‍ ഫലസ്തീന്‍ താരം അല്‍ബെയ്തിനാണ് സ്വര്‍ണം. വനിതകളുടെ 4(400) മീറ്റര്‍ റിലേയില്‍ ഇന്ത്യന്‍സംഘം വെള്ളി സ്വന്തമാക്കി. പ്രാചി, എം.ആര്‍ പൂവമ്മ, സരിതാബെന്‍ ഗെയ്ക്ക്‌വാദ്, വി.കെ വിസ്മയ എന്നിവരടങ്ങുന്ന സംഘമാണ് റിലേയില്‍ ഇന്ത്യക്കായി ട്രാക്കിലിറങ്ങിയത്.

പുരുഷന്‍മാരുടെ റിലേയും ഇന്ത്യ വെള്ളി സ്വന്തമാക്കി. മലയാളി താരം കുഞ്ഞുമുഹമ്മദ്, കെ.എസ് ജീവന്‍, മുഹമ്മദ് അനസ്, ആരോഹ്യ രാജീവ് എന്നിവരടങ്ങുന്ന സംഘമാണ് ഇന്ത്യക്ക് വേണ്ടി വെള്ളി മെഡല്‍ സ്വന്തമാക്കിയത്. ഇതോടെ ഇന്ത്യക്ക് മീറ്റില്‍ ഇന്ത്യക്ക് 18 മെഡലുകളായി.