കൂത്തുപറമ്പ് (കണ്ണൂര്‍): സ്വര്‍ണക്കടത്തുമായി ബന്ധപ്പെട്ട് ഇരുവിഭാഗങ്ങള്‍ തമ്മില്‍ സംഘര്‍ഷമുണ്ടായ സംഭവത്തില്‍ മുഖ്യപ്രതിയെ പൊലിസ് അറസ്റ്റ് ചെയ്തു.
കോഴിക്കോട് നടുവണ്ണൂരിലെ യു.കെ ബിന്‍ഷാദിനെ(25)യാണ് കൂത്തുപറമ്പ് സി.ഐ ബിനുമോഹന്‍ അറസ്റ്റ് ചെയ്തത്.
ഇന്നലെ വൈകീട്ട് കൂത്തുപറമ്പ് പൊലിസ് തലശ്ശേരി ജനറല്‍ ആശുപത്രിയിലെത്തി ഇയാളുടെ അറസ്റ്റ് രേഖപ്പെടുത്തുകയായിരുന്നു.

വിദേശത്തു നിന്നെത്തി കൂത്തുപറമ്പിലെ ലോഡ്ജില്‍ കൊവിഡ് നിരീക്ഷണത്തില്‍ കഴിഞ്ഞ ബിന്‍ഷാദിനെ മലപ്പുറത്തു നിന്നെത്തിയ ക്വട്ടേഷന്‍ സംഘം തട്ടിക്കൊണ്ടുപോകാന്‍ ശ്രമിക്കവെയുണ്ടായ സംഘര്‍ഷത്തില്‍ ഇയാള്‍ക്കു പരുക്കേറ്റിരുന്നു.
ആശുപത്രിയില്‍ പ്രവേശിപ്പിച്ച ബിന്‍ഷാദിന്റെ പരുക്ക് ഭേദമായതോടെ കൊവിഡ് പരിശോധന നടത്തി ഫലം നെഗറ്റീവായതോടെയാണ് അറസ്റ്റ് രേഖപ്പെടുത്തിയത്.
മലപ്പുറത്തു നിന്നെത്തിയ സംഘത്തിലുള്ളവരെ മര്‍ദിച്ച ബിന്‍ഷാദിനെ ഒന്നാം പ്രതിയാക്കി പൊലിസ് വധശ്രമത്തിന് കേസെടുത്തിരുന്നു. സംഭവവുമായി ബന്ധപ്പെട്ട് കേസില്‍ നേരത്തെ ആറു പേരെ അറസ്റ്റ് ചെയ്തിരുന്നു. രണ്ടുപേര്‍ കോഴിക്കോട് മെഡിക്കല്‍ കോളജില്‍ ചികിത്സയിലാണ്.