പയ്യോളി: അട്ടക്കുണ്ടിന് സമീപം നിയന്ത്രണം വിട്ട ബസ് മറിഞ്ഞ് 26 പേര്‍ക്ക് പരുക്കേറ്റു. 16 പേരെ മെഡിക്കല്‍ കോളജില്‍ പ്രവേശിപ്പിച്ചു. പത്ത് പേര്‍ കൊയിലാണ്ടി താലൂക്ക് ആശുപത്രിയില്‍ പ്രഥമ ചികിത്സക്ക് ശേഷം വിട്ടയച്ചു. വടകരയില്‍നിന്നും പേരാമ്പ്രയിലേക്ക് പോകുന്ന ഭയാന്‍ ബസ് മറ്റൊരു ബസിനെ മറികടക്കാന്‍ ശ്രമിക്കുന്നതിനിടയില്‍ ഇന്നലെ ഉച്ചയ്ക്ക് മൂന്നിനാണ് അപകടം. റോഡിന്റെ വലത് വശത്തുള്ള കോഴിക്കുന്നടത്തില്‍ മുഹമ്മദിന്റെ വീട്ടുപറമ്പിലെ വെള്ളക്കെട്ടിലേക്കാണ് ബസ് മറിഞ്ഞത്. ബസിന്റെ മുന്‍ഭാഗം പൂര്‍ണമായും തകര്‍ന്നു. ഓടിയെത്തിയ നാട്ടുകാരും പയ്യോളി പൊലിസും ചേര്‍ന്നാണ് പരുക്കേറ്റവരെ ആശുപത്രിയിലെത്തിച്ചത്.