മലപ്പുറം: ജില്ലാ വിജിലന്‍സ്- ആന്റി കറപ്ഷന്‍ ബ്യൂറോ ആവിഷ്‌കരിച്ച 'ക്രിയേറ്റീവ് വിജിലന്‍സ്' പരിപാടിയുടെ ഭാഗമായി നെഹ്‌റു യുവ കേന്ദ്രയില്‍ അഫിലിയേറ്റ് ചെയ്ത യൂത്ത് ക്ലബ് പ്രവര്‍ത്തകര്‍ക്കായി ബോധവത്കരണ സെമിനാര്‍ നടത്തി. നെഹ്‌റു യുവ കേന്ദ്ര ഹാളില്‍ നടത്തിയ സെമിനാര്‍ ഡി.വൈ.എസ്.പി.കെ.സലീം ഉദ്ഘാടനം ചെയ്തു. നെഹ്‌റു യുവ കേന്ദ്ര ജില്ലാ കോഡിനേറ്റര്‍ കെ.കുഞ്ഞഹമ്മദ് അധ്യക്ഷനായി. വിജിലന്‍സ് സര്‍ക്കിള്‍ ഇന്‍സ്‌പെക്ടര്‍മാരായ എം.ഗംഗാധരന്‍,എം.സി.കുഞ്ഞിമോയിന്‍ കുട്ടി എന്നിവര്‍ ക്ലാസെടുത്തു.
തുടര്‍ന്നു നടന്ന മുഖാമുഖം പരിപാടിയില്‍ വിജിലന്‍സ് വകുപ്പിന്റെ പ്രവര്‍ത്തനങ്ങള്‍, പരാതി നല്‍കേണ്ട രീതി, തുടര്‍ന്നുള്ള നടപടി ക്രമം എന്നിവയെക്കുറിച്ചു ഡി.വൈ.എസ്.പി.കെ.സലീം വിശദീകരിച്ചു.