ആലത്തൂര്‍: പോത്തുണ്ടി ശുദ്ധജലവിതരണ പദ്ധതിയില്‍ നിന്നുള്ള ചിറ്റിലഞ്ചേരി ഭാഗത്തേക്കുള്ള ജലവിതരണം മുടങ്ങിയിട്ട് ഒരാഴ്ച്ച. കുടവെള്ളമില്ലാതായതോടെ പ്രദേശത്തെ ആയിലത്തിലധികം കുടുംബങ്ങള്‍ ദുരിതത്തിലായി. ഒന്നിടവിട്ട ദിവസങ്ങളിലാണ് ചിറ്റില്ലഞ്ചേരി ഭാഗത്തേക്ക് ജലവിതരണം നടത്തുന്നത്. പോത്തുണ്ടിയില്‍ നിന്നുള്ള പ്രധാന കുഴലില്‍ അയിനംപാടം ഭാഗത്തുള്ള ചോര്‍ച്ചമൂലമാണ് കുടിവെള്ളം മുടങ്ങിയത്.
പോത്തുണ്ടിയില്‍നിന്ന് വെള്ളം ശുചീകരിച്ച് നെന്മാറ ജപമാല പള്ളിയ്ക്ക് സമീപമുള്ള ജലസംഭരണയില്‍ നിറച്ചാണ് അയിലൂര്‍, മേലാര്‍കോട് ഗ്രാമപഞ്ചായത്തുകളിലേക്ക് ജലവിതരണം നടത്തുന്നത്. കടമ്പിടി, പാഴിയോട്, നൊണ്ണംകുളം, ആലുംപാറ, വട്ടോമ്പാടം, നീലിച്ചിറ, ചിറ്റിലഞ്ചേരി തുടങ്ങിയ ഭാഗങ്ങളിലേക്കുള്ള ജലവിതരണമാണ് ഒരാഴ്ച്ചയായി പൂര്‍ണമായും മുടങ്ങിയത്.
ചില ഭാഗങ്ങളില്‍ കുടിവെള്ള സമിതികളുടെ നേതൃത്വത്തില്‍ ജലവിതരണം നടത്തുന്നുണ്ടെങ്കിലും കുഴല്‍കിണറില്‍ നിന്നുള്ള വെള്ളമായതിനാല്‍ കുടിവെള്ളത്തിന് ഉപയോഗിക്കാന്‍ കഴിയാത്ത സ്ഥിതിയാണ്.
സാധാരണ രീതിയില്‍ ഈ ഭാഗത്തേക്ക് ഉച്ചയ്ക്ക് ശേഷമാണ് ജലവിതരണം നടത്തുന്നത്. ഇതോടെ വാലറ്റ പ്രദേശമായ ചിറ്റിലഞ്ചേരിയിലുള്ള വീട്ടമ്മമാര്‍ രാത്രി വൈകിയും പൊതുടാപ്പുകളില്‍ വെള്ളം ശേഖരിക്കാന്‍ നില്‍ക്കേണ്ട സ്ഥിതിയാണ്. പ്രധാന കുഴലിലെ ചോര്‍ച്ച അടച്ചുവെന്നും ഉടന്‍ തന്നെ കുടിവെള്ള വിതരണം പുനഃസ്ഥാപിക്കുമെന്നും നെന്മാറ ജല അതോറിറ്റി അസിസ്റ്റന്റ് എന്‍ജിനീയര്‍ പറഞ്ഞു.