ന്യൂഡല്‍ഹി: പ്രതിപക്ഷത്തിന്റെ ഐക്യപ്പെടലിനെ പ്രതിരോധിക്കാനും അടുത്ത തെരഞ്ഞെടുപ്പിലും അധികാരത്തിലേറാനുമായി പ്രധാനമന്ത്രി നരേന്ദ്ര മോദിയും ബി.ജെ.പി അധ്യക്ഷന്‍ അമിത്ഷായും ചേര്‍ന്ന് വിളിച്ചുചേര്‍ത്ത പ്രത്യേക കോര്‍കമ്മിറ്റി യോഗം ഡല്‍ഹിയില്‍ നടന്നു.
കഴിഞ്ഞ അഞ്ചുവര്‍ഷത്തെ ഭരണ നേട്ടങ്ങള്‍ ജനങ്ങളില്‍ എത്തിക്കുന്നതിനും തെരഞ്ഞെടുപ്പില്‍ എന്തെല്ലാം തന്ത്രങ്ങള്‍ ആവിഷ്‌കരിക്കണമെന്നതുസംബന്ധിച്ചുമുള്ള കാര്യങ്ങള്‍ ചര്‍ച്ച ചെയ്യാനുമായിട്ടാണ് യോഗം വിളിച്ചത്. ബി.ജെ.പി ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാര്‍, ഉപമുഖ്യമന്ത്രിമാര്‍ എന്നിവരാണ് യോഗത്തില്‍ സംബന്ധിച്ചത്.
പാര്‍ട്ടി ഭരിക്കുന്ന മധ്യപ്രദേശ്, ഛത്തിസ്ഗഡ്, രാജസ്ഥാന്‍ സംസ്ഥാനങ്ങളില്‍ ഈ വര്‍ഷം നിയമസഭാ തെരഞ്ഞെടുപ്പ് നടക്കുകയാണ്. തുടര്‍ച്ചയായി ഭരണം നടത്തുന്ന ഈ സംസ്ഥാനങ്ങളില്‍ വീണ്ടും അധികാരത്തിലേറാനുള്ള തന്ത്രങ്ങളാണ് യോഗത്തില്‍ മുഖ്യമായും ചര്‍ച്ചയായത്. ഈ മൂന്ന് സംസ്ഥാനങ്ങളില്‍ ഭരണത്തിനെതിരേ ശക്തമായ ജനവികാരമാണ് ഉയരുന്നത്. മധ്യപ്രദേശിലും ഛത്തിസ്ഗഡിലും കഴിഞ്ഞ 15 വര്‍ഷമായി ബി.ജെ.പിയാണ് തുടര്‍ച്ചയായി ഭരിക്കുന്നത്. രാജസ്ഥാനില്‍ മുഖ്യമന്ത്രി വസുന്ധര രാജെ രണ്ടാം തവണയാണ് അധികാരത്തുടര്‍ച്ചക്കായി ശ്രമിക്കുന്നത്.
ലോക്‌സഭാ തെരഞ്ഞെടുപ്പും ബി.ജെ.പിയെ സംബന്ധിച്ചിടത്തോളം നിര്‍ണായകമാണ്. ഈ സാഹചര്യത്തിലാണ് പ്രധാനമന്ത്രിയും പാര്‍ട്ടി അധ്യക്ഷനും യോഗം വിളിച്ചത്. സംസ്ഥാന സര്‍ക്കാരുകളുടെ പ്രവര്‍ത്തനത്തിന്റെ പ്രോഗ്രസ് റിപ്പോര്‍ട്ട് യോഗത്തില്‍ ആവശ്യപ്പെട്ടിട്ടുണ്ട്. കേന്ദ്ര സര്‍ക്കാര്‍ പ്രഖ്യാപിച്ച ഏതെങ്കിലും 12 പദ്ധതികളുടെ നടത്തിപ്പുമായി ബന്ധപ്പെട്ട് സംസ്ഥാനങ്ങള്‍ സ്വീകരിച്ച നടപടികളാണ് ആവശ്യപ്പെട്ടത്. അടുത്ത ആഴ്ചകളില്‍ പാര്‍ട്ടി ഭരിക്കുന്ന സംസ്ഥാനങ്ങളില്‍ അമിത്ഷാ സന്ദര്‍ശനം നടത്തുമെന്നും പാര്‍ട്ടി നേതൃത്വം അറിയിച്ചു.