പനമരം: പ്രളയബാധിതര്‍ക്കുള്ള സഹായം കൂടിയതോടെ സഹായിക്കരുതെന്ന അപേക്ഷയുമായി ഫ്‌ളക്‌സ് ബോര്‍ഡ്.
പനമരം ചങ്ങാടക്കടവ്, പരക്കുനി ഭാഗങ്ങളിലുള്ളവരാണ് ഇത്തരം ബോര്‍ഡ് സ്ഥാപിച്ചത്. പനമരം മേഖലയില്‍ ഏറ്റവും കൂടുതല്‍ ദുരിതബാധിതര്‍ ഉള്ളവര്‍ ചങ്ങാടക്കടവ് പരക്കുനി പ്രദേശങ്ങളിലുള്ളവരാണ്. പുഴയോരത്തെ പ്രദേശങ്ങള്‍ മുഴുവനായും വെള്ളത്തില്‍ മുങ്ങിയിരുന്നു. വെള്ളമിറങ്ങി ദുരിതബാധിതര്‍ തിരിച്ചെതിയതോടെ ഇവിടെക്ക് മറ്റുള്ള ജില്ലകളില്‍ നിന്നും ഇതര സംസ്ഥാനങ്ങളില്‍ നിന്നും ഉള്‍പ്പെടെ സഹായമെത്തി. ലക്ഷക്കണക്കിന് രൂപയുടെ സഹായമാണ് ഈ മേഖലയിലുള്ളവര്‍ക്ക് ലഭിച്ചത്. ഭക്ഷണ കിറ്റും മറ്റ് ഉല്‍പന്നങ്ങളും വാങ്ങിയവര്‍ തന്നെ വീണ്ടും വാങ്ങുന്ന സാഹചര്യം ഉണ്ടായി. ഇതിനെ പ്രദേശവാസികളില്‍ ചിലര്‍ ചോദ്യം ചെയ്തതോടെ വാക്ക് തര്‍ക്കവുമുണ്ടായി. അപ്പോഴും സഹായ പ്രവാഹം തുടര്‍ന്നുകൊണ്ടേയിരുന്നു. പ്രശ്‌നം സംഘര്‍ഷാവസ്ഥയിലേക്ക് നിങ്ങിയതോടെയാണ് പ്രദേശത്തെ ഏതാനും യുവാക്കള്‍ ചേര്‍ന്ന് സാഹായങ്ങള്‍ക്ക് നന്ദി വീണ്ടും സഹായത്തിന് ആവശ്യല്ലെന്ന് അറിയിച്ച് കൊണ്ടുള്ള ബോര്‍ഡ് സ്ഥാപിച്ചത്.