ജിദ്ദ: 2020ഓടെ സ്വകാര്യമേഖലയില്‍ സ്വദേശികളുടെ എണ്ണം നാലരലക്ഷമാക്കുന്നതിനാണ് തൊഴില്‍ സാമൂഹിക വികസന മന്ത്രാലയത്തിന്റെ ലക്ഷ്യമെന്നു മന്ത്രാലയ സെക്രട്ടറി ഡോ. ഫഹദ് അല്‍ ഉവൈദി. ഇതിന്റെ ഭാഗമായാണ് മൊബൈല്‍ കടകളില്‍ സ്വദേശിവല്‍ക്കരണം ശക്തമാക്കിയത്. ഈ വര്‍ഷംതന്നെ മൊബൈല്‍ ഫോണ്‍ കടകളില്‍ കാല്‍ലക്ഷം സ്വദേശികള്‍ക്കു തൊഴില്‍ ലഭ്യമാക്കുന്നതിനാണ് ലക്ഷ്യമെന്നും അദ്ദേഹം പറഞ്ഞു.

ജ്വല്ലറികളിലും പച്ചക്കറിക്കടകളിലും ലിമോസിന്‍ കമ്പനികളിലും സമ്പൂര്‍ണ സഊദിവല്‍ക്കരണം നടപ്പാക്കുന്നതു വേണ്ടത്ര വിജയിച്ചില്ല. അതുകൊണ്ടാണ് ഇതില്‍നിന്നു വ്യത്യസ്തമായി അഞ്ചു മന്ത്രാലയങ്ങളുടെ വകുപ്പുകളുടെ സഹകരണത്തോടെ സംയുക്തമായി മൊബൈല്‍ കടകളില്‍ സമ്പൂര്‍ണ സ്വദേശിവല്‍ക്കരണം നടപ്പാക്കുന്നത്. തൊഴില്‍ സാമൂഹിക വികസന മന്ത്രാലയത്തിനു കീഴില്‍ പരിശോധകരുടെ എണ്ണം കുറവാണ്. നിലവില്‍ 700 പരിശോധകരാണുള്ളത്.

ഇതു പരിശോധനയെ സാരമായി ബാധിക്കുന്നുണ്ട്. മന്ത്രാലയം കണ്ടെത്തിയ നിയമലംഘകരില്‍ 25 ശതമാനത്തില്‍ മാത്രമാണ് ശിക്ഷാനടപടികള്‍ സ്വീകരിച്ചതെന്നും അദ്ദേഹം അറിയിച്ചു.