ന്യൂഡല്‍ഹി: 17മാത് ലോക്‌സഭയിലേക്കുള്ള തെരഞ്ഞെടുപ്പില്‍ പകുതിയേറെ മണ്ഡലങ്ങളിലേക്കു വോട്ടെടുപ്പ് പൂര്‍ത്തിയായിരിക്കെ കോണ്‍ഗ്രസ് അധികാരത്തില്‍ വരുമെന്ന് പ്രവചിച്ച് അമേരിക്കന്‍ ആസ്ഥാനമായ വെബ്‌സൈറ്റ്. 213 സീറ്റുകള്‍ കോണ്‍ഗ്രസ് നേടുമെന്ന് 'മീഡിയം ഡോട്ട് കോം' ആണ് പ്രവചിച്ചിരിക്കുന്നത്. 543 അംഗ ലോക്‌സഭയില്‍ ബി.ജെ.പി 170 സീറ്റുകള്‍ മാത്രമേ നേടുകയുള്ളൂവെന്നും വെബ്‌സൈറ്റ് പറയുന്നു.

സര്‍ക്കാര്‍ രൂപീകരിക്കാനാവശ്യമായ കേവലഭൂരിപക്ഷം 282 സീറ്റുകളാണ്. ബ്രിട്ടീഷ് ഗവേഷണ സംഘത്തിന്റെ പഠനഫലം ആധാരമാക്കിയാണ് വെബ്‌സൈറ്റ് ഈ നിഗമനത്തിലെത്തിയത്. ഇന്ത്യയിലെ 24 സംസ്ഥാനങ്ങളില്‍ നിന്നുമുള്ള 20,500ഓളം ജനങ്ങളില്‍ നിന്നു ലഭിച്ച വിവരത്തിന്റെ അടിസ്ഥാനത്തിലാണ് വെബ്‌സൈറ്റ് റിപ്പോര്‍ട്ട് പ്രസിദ്ധീകരിച്ചത്. ഗവേഷണ സംഘത്തോട് പ്രതികരിച്ചവരില്‍ 48 ശതമാനം സ്ത്രീകളും 52 പുരുഷന്മാരുമാണ്.
കോണ്‍ഗ്രസ് 39 ശതമാനം വോട്ടുകളാവും സ്വന്തമാക്കുക. ബി.ജെ.പിക്ക് 31 ശതമാനം വോട്ടുകളും ലഭിക്കും. 2014ല്‍ മൂന്നിലൊന്ന് ഭൂരിപക്ഷത്തോടെ അധികാരത്തിലേറിയപ്പോഴും ബി.ജെ.പിക്ക് ഇത്രയും വോട്ട് ശതമാനമേ ലഭിച്ചിരുന്നുള്ളൂ. കോണ്‍ഗ്രസ് നേതൃത്വം നല്‍കുന്ന യു.പി.എ മുന്നണിക്കും ബി.ജെ.പിയുടെ എന്‍.ഡി.എ മുന്നണിക്കും പുറമെ മറ്റ് പാര്‍ട്ടികള്‍ മൊത്തമായി 160 സീറ്റുകള്‍ നേടും. ഈ കക്ഷികള്‍ക്ക് 30 ശതമാനം വോട്ടുകളും ലഭിക്കും.