ദമാം: ആറുമാസമായി കൊവിഡ് പശ്ചാത്തലത്തിൽ പ്രതിസന്ധിയിലായ പ്രവാസി കുടുംബങ്ങളോട് കേന്ദ്ര സംസ്ഥാന സർക്കാരുകൾ പുലർത്തുന്ന നിസ്സംഗത അവസാനിപ്പിക്കണമെന്ന് കിഴക്കൻ പ്രവിശ്യാ കെഎംസിസി പ്രവർത്തക സമിതി ആവശ്യപ്പെട്ടു. പ്രിയപ്പെട്ട ബന്ധുക്കളെ കാണാനാകാതെ അന്ത്യ ശ്വാസമെടുത്ത് പ്രവാസ മണ്ണിൽ അന്ത്യ വിശ്രമം കൊള്ളുന്ന നിരവധി പേരുടെ കുടുംബങ്ങളെ സർക്കാരുകൾ ഇതുവരെ പരിഗണിച്ചിട്ടില്ല. ഇവർക്ക് അർഹമായ ആശ്വാസ ധനം നൽകാനുള്ള നടപടികൾ വൈകുന്നത് നീതിനിഷേധമാണ്.

     മാസങ്ങളായി ജോലി നഷ്ടപ്പെട്ട ലക്ഷക്കണക്കിന് പ്രവാസികൾ നാട്ടിൽ കഴിയുമ്പോൾ പ്രഖ്യാപിച്ച തുച്ഛമായ 5000 രൂപ പോലും ഭൂരിഭാഗം ആളുകൾക്കും ഇതുവരെ നൽകിയിട്ടില്ല. സർക്കാർ തുടരുന്ന അനാസ്ഥയ്ക്കെതിരെ കൊവിഡ് മാനദണ്ഡങ്ങൾലംഘിച്ച് സമരം നടത്തേണ്ട അവസ്ഥയിലേക്ക് പ്രവാസികളെ എത്തിക്കരുതെന്നും പ്രവിശ്യാ കെഎംസിസി പ്രവർത്തക സമിതി യംഗങ്ങൾ മുന്നറിയിപ്പ് നൽകി.
മുഹമ്മദ് കുട്ടി കോഡൂർ അധ്യക്ഷത വഹിച്ച യോഗം ദേശീയ സെക്രട്ടേറിയറ്റ് അംഗം സക്കീർ അഹമ്മദ് ഉദ്ഘാടനം ചെയ്തു.

     മാമു നിസാർ,കാദർ മാസ്റ്റർ വാണിയമ്പലം,മാലിക്ക് മക്ബൂൽ ആലുങ്കൽ, സലീം അരീക്കാട്, സിദ്ദിഖ് പാണ്ടികശാല, സലിം പാണമ്പ്ര, സിറാജ് ആലുവ, അഷ്റഫ് ഗസാൽ, ഹുസൈൻ വേങ്ങര, ബഷീർ ബാഖവി പറമ്പിൽപീടിക, ഹബീബ് ബാലുശ്ശേരി, ഉസ്സൻ കുട്ടി, യു കെ ഉമർ, അബ്ദുറഹ്മാൻ മൂളൂർ, റാഫി പട്ടാമ്പി എന്നിവർ സംസാരിച്ചു. ജനറൽ സെക്രട്ടറി ആലിക്കുട്ടി ഒളവട്ടൂർ സ്വാഗതവും സിപി ഷെരീഫ് നന്ദിയും പറഞ്ഞു.