ആലപ്പുഴ: നഗരത്തില്‍ ചുങ്കപ്പാലത്തിന് സമീപം പ്രവര്‍ത്തിക്കുന്ന വെളിച്ചെണ്ണ ഫാക്ടറിയില്‍ അഗ്നിബാധ. ചന്ദ്രാ ഓയില്‍ മില്ലില്‍ ഇന്നലെ പുലര്‍ച്ചെ അഞ്ച് മണിയോടെയാണ് അഗ്നിബാധയുണ്ടായത്. ഏഴ് യൂനിറ്റ് ഫയര്‍ഫോഴ്‌സ് സംഘം നാലുമണിക്കൂറോളം പരിശ്രമിച്ചാണ് തീ നിയന്ത്രണവിധേയമാക്കിയത്.ഷോര്‍ട്ട് സര്‍ക്ക്യൂട്ടാണ് അപകടത്തിന് കാരണമെന്നാണ് പ്രാഥമിക നിഗമനം.എന്നാല്‍ അട്ടിമറിക്കുള്ള സാധ്യതയും പൊലിസ് തള്ളിക്കളയുന്നില്ല. മില്ലിന് സമീപം താമസിക്കുന്ന കെ.എസ്.ഇ.ബി ഓഡിറ്റ് ഓഫിസിലെ ജീവനക്കാരി അമ്പിളി പുലര്‍ച്ചെ 5.15 ഓടെ എഴുന്നേറ്റ് പുറത്തിറങ്ങിയപ്പോഴാണ് തീ ആളിപ്പടരുന്നത് കണ്ടത്. ഉടന്‍തന്നെ വീട്ടുകാരെ വിളിച്ചുണര്‍ത്തിയശേഷം ആലപ്പുഴ അഗ്നിരക്ഷാ സേനയെ വിവരമറിയിക്കുകയായിരുന്നു.
നാട്ടുകാരും അഗ്നിരക്ഷാ സേനയും പുലര്‍ച്ചെ 5.20 മുതല്‍ രാവിലെ ഒന്‍പതുവരെ പ്രയത്‌നിച്ചാണ് തീ നിയന്ത്രണ വിധേയമാക്കിയത്. കൊപ്രയും എണ്ണയുമായതിനാല്‍ തീയണച്ചശേഷവും മില്ലില്‍ നിന്ന് വ്യാപകമായി പുകയുരുന്നുണ്ടായിരുന്നു. പുകഞ്ഞുകൊണ്ടിരിക്കുന്ന ഭാഗങ്ങള്‍ ജെസിബി ഉപയോഗിച്ച് കുറച്ചുവീതം നീക്കി വെള്ളമൊഴിച്ചാണ് പുക ശമിപ്പിച്ചത്. ഈ പ്രവര്‍ത്തനം ശനിയാഴ്ച വൈകിട്ട് വരെ നീണ്ടു. ആദ്യം വെളിച്ചെണ്ണ പ്ലാന്റിലും പിന്നീട് കൊപ്ര സൂക്ഷിച്ചിരുന്ന ലോറിയിലേക്കും തീ പടരുകയായിരുന്നു. കെട്ടിടത്തിന് മുകള്‍ഭാഗത്തെ ഷീറ്റ് പൊട്ടിത്തെറിച്ചു. ഫാക്ടറി പൂര്‍ണമായി കത്തി നശിച്ചു. ഒന്നരക്കോടി രൂപയുടെ നഷ്ടമാണ് കണക്കാക്കുന്നത്. അപകടസമയത്ത് ഫാക്ടറിയില്‍ ജീവനക്കാരില്ലായിരുന്നതിനാല്‍ വന്‍ദുരന്തം ഒഴിവായി. ആലപ്പുഴയ്ക്ക് പുറമേ ചേര്‍ത്തല, ഹരിപ്പാട്, ചങ്ങനാശേരി എന്നിവിടങ്ങളില്‍ നിന്നും ഫയര്‍ യൂനിറ്റുകളെത്തിയാണ് സമീപ വീടുകളിലേക്കടക്കം അഗ്നി പടരുന്നത് തടഞ്ഞത്. ആലപ്പുഴ സ്റ്റേഷന്‍ ഓഫിസര്‍ എം.എ ജോണിച്ചന്‍, അസിസ്റ്റന്റ് സ്റ്റേഷന്‍ ഓഫിസര്‍ ആര്‍. ഗിരീഷ് എന്നിവരുടെ നേതൃത്വത്തിലായിരുന്നു രക്ഷാ പ്രവര്‍ത്തനം.
1956ല്‍ എ.വി.ജനാര്‍ദ്ദനന്‍ 'ബാബു ഓയില്‍ മില്‍' എന്ന പേരില്‍ ആരംഭിച്ച ഫാക്ടറി 1987 മുതല്‍ 'ചന്ദ്രാ ഓയില്‍ മില്‍' എന്ന പേരില്‍ മക്കളായ ജെ.എസ്.ഷിബു,ജെ.എസ്.സന്തോഷ് എന്നിവര്‍ ചേര്‍ന്നാണ് നടത്തുന്നത്. അക്ഷയ എന്ന പേരില്‍ ബ്രാന്‍ഡന്‍ഡ് വെളിച്ചെണ്ണ ഇവര്‍ വിപണിയിലെത്തിക്കുന്നുണ്ട്. രാസവസ്തുക്കള്‍ ചേര്‍ന്ന വെളിച്ചെണ്ണ വിപണിയിലെത്തിക്കുന്ന തമിഴ്‌നാട് ലോബിക്ക് സംഭവത്തില്‍ പങ്കുണ്ടോയെന്ന് സംശയമുണ്ട്. ഒരുകാലത്ത് വെളിച്ചെണ്ണ ഉല്‍പാദന ഫാക്ടറികളുടെ കേന്ദ്രമായിരുന്ന ചുങ്കത്ത് ഇന്ന് അവശേഷിച്ചിരുന്ന ഏക ഫാക്ടറിയാണ് ചന്ദ്രാ ഓയില്‍ മില്‍.