സാന്‍ ഫ്രാന്‍സിസ്‌കോ: അമേരിക്കയിലെ ഉത്തരപടിഞ്ഞാറന്‍ നഗരമായ സെറ്റിലില്‍ ഗൂഗിളിന്റെ കാംപസില്‍ നിര്‍മാണ ജോലിയിലായിരുന്ന ക്രെയിന്‍ തകര്‍ന്ന് നാലുപേര്‍ മരിച്ചു. നാലുപേര്‍ക്ക് പരുക്കേല്‍ക്കുകയും ചെയ്തു. ശനിയാഴ്ച ഉച്ചയോടെയായിരുന്നു സംഭവം.

നഗരമധ്യത്തിലെ ഒരു കെട്ടിടത്തിന്റെ മുകളില്‍ നിന്ന് താഴേക്കു വീണ ക്രെയിന്‍ താഴെയുള്ള ആറു വാഹനങ്ങളുടെ മേല്‍ പതിക്കുകയായിരുന്നുവെന്ന് അഗ്നിശമനസേന അറിയിച്ചു. കൊല്ലപ്പെട്ടതില്‍ മൂന്നുപേര്‍ പുരുഷന്മാരും ഒന്ന് സ്ത്രീയുമാണ്.
രണ്ടുപേര്‍ ക്രെയിനിലെ ഓപറേറ്റര്‍മാരും ബാക്കിയുള്ളവര്‍ കാറുകളിലുണ്ടായിരുന്നവരുമാണ്. പരിക്കേറ്റവരില്‍ നാലുമാസം പ്രായമുള്ള കുഞ്ഞുമുള്‍പ്പെടുന്നു. 25കാരിയായ അമ്മയും കുഞ്ഞും നിസാര പരുക്കുകളോടെ രക്ഷപ്പെട്ടു.