തിരുവനന്തപുരം: മൂന്നാര്‍ ദൗത്യസംഘത്തിന്റെ പ്രവര്‍ത്തനങ്ങള്‍ ഇടക്കുവച്ച് നിന്നുപോകാനിടയായ സാഹചര്യങ്ങള്‍ പരിശോധിക്കണമെന്നും പശ്ചിമഘട്ട മേഖലയിലടക്കം നടന്ന അനധികൃത കൈയേറ്റങ്ങള്‍ ഒഴിപ്പിച്ച് നവകേരള നിര്‍മിതിക്കായുള്ള മാസ്റ്റര്‍പ്ലാന്‍ രൂപീകരിക്കണമെന്നും ഭരണപരിഷ്‌കാര കമ്മിഷന്‍ ചെയര്‍മാന്‍ വിഎസ് അച്യുതാനന്ദന്‍.
മൂന്നാറിലും പരിസര പ്രദേശങ്ങളിലുമുള്ള അനിയന്ത്രിത കൈയേറ്റങ്ങള്‍ ഒഴിവാക്കുന്നതിന് തുടക്കമിട്ടത് ഇടത് സര്‍ക്കാരാണ്. മന്ത്രിസഭ തീരുമാനിച്ചാണ് അന്ന് ദൗത്യസംഘം രൂപീകരിച്ചത്. മൂന്നാര്‍ മാത്രമല്ല, കേരളത്തിലെമ്പാടും അനിയന്ത്രിത കൈയേറ്റങ്ങള്‍ ഒഴിവാക്കിയെടുക്കണം.
പ്രളയക്കെടുതി വിലയിരുത്തുന്നതിനും പുനരുദ്ധാരണ നടപടികള്‍ ചര്‍ച്ച ചെയ്യുന്നതിനും ചേര്‍ന്ന പ്രത്യേക നിയമസഭാ സമ്മേളനത്തില്‍ സംസാരിക്കുകയായിരുന്നു അദ്ദേഹം. വികസനം വേണ്ടെന്ന് ആരും പറയില്ല. പക്ഷേ, കൃത്യമായ ആസൂത്രണത്തിന്റെയും മാസ്റ്റര്‍ പ്ലാനിന്റെയും അഭാവത്തില്‍ വികസനം നടത്തരുത്. പ്രകൃതിയെ നശിപ്പിക്കാത്ത വികസനമാണ് ഇടത് സര്‍ക്കാരിന്റെ മുദ്രവാക്യം. അത് ചിലര്‍ക്ക് വേണ്ടി മാറുന്നതാകരുത്. നവകേരള സൃഷ്ടിക്കായി ആദ്യം വേണ്ടത് സമഗ്രമായ മാസ്റ്റര്‍ പ്ലാനാണ്. അതിന് രൂപം നല്‍കാന്‍ കേരളത്തിലെ യുവജനങ്ങളുടെയും വിദഗ്ധരുടെയും സഹായം തേടണം.
നയരൂപീകരണത്തില്‍ വീഴ്ചപറ്റിയത് സ്വയംവിമര്‍ശനമായി കാണാം. കുന്നിടിച്ചും, വയല്‍ നികത്തിയും, തടയണ കെട്ടിയും നടത്തുന്ന നിര്‍മാണ പ്രവര്‍ത്തനങ്ങള്‍ ഇനിയും കണ്ടില്ലെന്ന് നടിക്കാനാവില്ല. ദുരന്ത നിവാരണ പ്രവര്‍ത്തനങ്ങളില്‍ കാണിക്കുന്ന ശുഷ്‌കാന്തി അവയുണ്ടാകാതിരിക്കുന്നതിലും കാണിക്കണമെന്നും വി.എസ് പറഞ്ഞു.
അശാത്രീയമായ വികസനങ്ങള്‍ അവസാനിപ്പികണം. വികസനം എന്ന ലേബലില്‍ അനിയന്ത്രിതമായി പ്രകൃതിയില്‍ നടത്തുന്ന ഇടപെടലുകള്‍ക്ക് നിയന്ത്രണം വരണം. ക്വാറികള്‍ക്ക് നിയമപരമായി നല്‍കിയ ഇളവുകള്‍ പിന്‍വലിച്ചാകണം അതിന് തുടക്കമിടേണ്ടത്. നെല്‍വയല്‍ തണ്ണീര്‍ത്തട നിയമത്തിന്റെ സത്ത ചോര്‍ത്തിക്കളയരുത്. അത് കൂടുതല്‍ കര്‍ശനമാക്കി മാതൃകാപരമായി പ്രാവര്‍ത്തികമാക്കണം.
മാധവ് ഗാഡ്ഗില്‍ റിപ്പോര്‍ട്ടിനെ കേരളം ശാസ്ത്രീയമായി സമീപിച്ചില്ല. മറിച്ച്, രാഷ്ട്രീയമായി മാത്രമേ പരിഗണിച്ചുള്ളൂ. പശ്ചിമഘട്ടത്തോട് മല്ലിടാന്‍ കെല്‍പ്പില്ലെന്നുള്ള ബോധം ഇപ്പോള്‍ കേരളത്തിന് വന്നിട്ടുണ്ടെന്നും വി.എസ് പറഞ്ഞു.