ചേളാരി: എസ്.കെ.എസ്.ബി.വി സില്‍വര്‍ ജൂബിലി ആഘോഷത്തിന്റെ ഭാഗമായി സംഘടിപ്പിക്കുന്ന അക്ഷരമുറ്റത്തെ സ്‌നേഹഗുരുവിന് കുരുന്നുകളുടെ ആദരം 'ഗുരുമുഖത്ത് ' ഒക്ടോബര്‍ രണ്ടിന് മദ്‌റസാ അധ്യാപക ദിനത്തില്‍ യൂനിറ്റ്-റെയ്ഞ്ച് തലങ്ങളില്‍ നടക്കും. മദ്‌റസാ പരിധിയില്‍ ദീര്‍ഘകാലം അധ്യാപക രംഗത്തു പ്രവര്‍ത്തിച്ച ഗുരുനാഥന്‍മാരെയും സേവന കാലയളവില്‍ മികച്ച സംഭാവനകള്‍ നല്‍കിയ മദ്‌റസാ അധ്യാപകരെയും പരിപാടിയില്‍ ആദരിക്കും.
സില്‍വര്‍ ജൂബിലിയുടെ ഭാഗമായി മുഴുവന്‍ മദ്‌റസാ യൂനിറ്റ് കേന്ദ്രങ്ങളിലും പരിപാടി സംഘടിപ്പിക്കാന്‍ പ്രവര്‍ത്തകര്‍ മുന്നോട്ടുവരണമെന്ന് സംസ്ഥാന കമ്മിറ്റി ആഹ്വാനം ചെയ്തു. യൂനിറ്റ് തലങ്ങളില്‍ ആദരിക്കല്‍, പ്രമേയ പ്രഭാഷണം, അനുഭവം പങ്കുവയ്ക്കല്‍, പ്രാര്‍ഥനാ സദസ്, വിദ്യാര്‍ഥി സംഗമം എന്നിവയും റെയ്ഞ്ച് തലങ്ങളില്‍ പ്രമേയ പ്രഭാഷണം, പ്രവര്‍ത്തക സംഗമം എന്നിവയും നടക്കും. പരിപാടി വന്‍വിജയമാക്കണമെന്ന് സംസ്ഥാന പ്രസിഡന്റ് പാണക്കാട് സയ്യിദ് അസീല്‍ അലി ശിഹാബ് തങ്ങള്‍, ജനറല്‍ സെക്രട്ടറി അഫ്‌സല്‍ രാമന്തളി, ട്രഷറര്‍ ഫുആദ് വെള്ളിമാട്കുന്ന് എന്നിവര്‍ അഭ്യര്‍ഥിച്ചു.