കൊച്ചി: ജില്ലയിലെ എല്‍.പി സ്‌കൂള്‍ അധ്യാപക ഒഴിവുകളില്‍ കാലാവധി അവസാനിച്ച റാങ്ക് ലിസ്റ്റില്‍ നിന്നും നിയമനം നടത്തണമെന്ന് കേരള അഡ്മിനിസ്‌ട്രേറ്റീവ് ട്രൈബൂണല്‍ ഉത്തരവിട്ടു. 2016 ഒക്ടോബര്‍ 20 ന് കാലാവധി അവസാനിച്ച പി.എസ്.സി റാങ്ക് ലിസ്റ്റില്‍ നിന്നും 33 ഒഴിവുകളിലേക്ക് നിയമനം നടത്തണമെന്നാണ് ട്രൈബ്യൂണല്‍ നിര്‍ദേശം. കാലവധി അവസാനിച്ച റാങ്ക് ലിസ്റ്റില്‍ ഉണ്ടായിരുന്ന ഏതാനും ഉദ്ധ്യോഗാര്‍ത്ഥികള്‍ സമര്‍പ്പിച്ച ഹരജിയിലാണ് ട്രൈബൂണല്‍ ഉത്തരവ്.
2012 ഏപ്രില്‍ 20ന് നിലവില്‍ വന്ന എല്‍.പി സ്‌കൂള്‍ അസിസ്റ്റന്റ് തസ്തികയുടെ റാങ്ക് ലിസ്റ്റിന്റെ കാലാവധി 2016 ഒക്ടോബര്‍ 20 ന് അവസാനിച്ചിരുന്നു. മെയിന്‍ ലിസ്റ്റില്‍ 352 പേരും സപ്ലിമെന്ററി ലിസ്റ്റില്‍ 311 പേരുമുണ്ടായിരുന്ന ലിസ്റ്റില്‍ നിന്നും 255 പേരുടെ നിയമനമാണ് നടത്തിയത്. റാങ്ക് ലിസ്റ്റിന് കാലാവധി ഉണ്ടായിരുന്ന സമയങ്ങളില്‍ ഒഴിവുകള്‍ ഉണ്ടായിട്ട് തങ്ങളെ നിയമനം ലഭിച്ചില്ലെന്ന് കാണിച്ചാണ് ഉദ്ധ്യോഗാര്‍ത്ഥികള്‍ കോടതിയെ സമീപിച്ചത്. എല്ലാ വര്‍ഷവും അധ്യായന വര്‍ര്‍ഷാരംഭം സ്റ്റാഫ് ഫിക്‌സേഷന്‍ നടത്താറുണ്ടെങ്കിലും 2016 -17ല്‍ സ്റ്റാഫ് ഫിക്‌സേഷന്‍ നടത്തിയിരുന്നില്ല. 2016-17 ലെ സ്റ്റാഫ് ഫിക്‌സേഷന്‍ നടത്തിയതാകട്ടെ കോടതി ഉത്തരവ് പ്രകാരം 2017-18 ലാണ്. 2016 വരെ അധ്യാപക വിദ്യാര്‍ത്ഥി അനുപാതം 1:35 ആയിരുന്നത് കോടതി വിധിയുടെ അടിസ്ഥാനത്തില്‍ 1:30 ആക്കിയിരുന്നു. 2017-18 ല്‍ റീ ഫിക്‌സേഷന്‍ നടത്തിയപ്പോള്‍ നിരവധി ഒഴിവുകള്‍ ഉണ്ടായി. 2016-17ല്‍ സ്റ്റാഫ് ഫിക്‌സേഷന്‍ നടത്താത്തതിനെ തുടര്‍ന്ന് കോടതി ഉത്തരവ് പ്രകാരം റീ ഫിക് സേഷന്‍ നടത്തിയപ്പോള്‍ കിട്ടിയ ഒഴിവുകള്‍ തങ്ങള്‍ക്കുള്ളതാണെന്നും 2016-17ല്‍ സ്റ്റാഫ് ഫിക്‌സേഷന്‍ നടത്താത്തത് മൂലമാണ് തങ്ങള്‍ക്ക് നിയമനം ലഭിക്കാതിരുന്നതെന്നുമാണ് ഹരജിക്കാരുടെ പ്രധാന വാദം. ഇതിന്റെ അടിസ്ഥാനത്തിലാണ് 33 ഒഴിവുകളില്‍ റദ്ദായ റാങ്ക് ലിസ്റ്റില്‍ നിന്നും നിയമനം നടത്താന്‍ കോടതി ഉത്തരവിട്ടത്. രണ്ട് മാസത്തിനകം നടപടികള്‍ പൂര്‍ത്തികരിക്കണമെന്നും വിധിയില്‍ പറയുന്നു.
നിലവില്‍ പുതിയ എല്‍.പി.എസ്.എ തസ്തികയുടെ ചുരുക്കപ്പട്ടിക ആയെങ്കിലും റാങ്ക് ലിസ്റ്റിന്റെ നടപടിക്രമങ്ങള്‍ പൂര്‍ത്തിയായി വരുന്നതേയുള്ളു. അതുകൊണ്ട് തന്നെ നിരവധി ഒഴിവുകള്‍ ഇപ്പോള്‍ നിലവിലുണ്ട്. പല സ്‌കൂളുകളിലും ദിവസ വേതനക്കാരെ വെച്ചാണ് അധ്യയനം നടത്തുന്നത്. പഴയ ലിസ്റ്റില്‍ നിന്നും 33 ഒഴിവുകളില്‍ നിയമനം നടത്തുന്നതോടെ കുറച്ച് സ്‌കൂളുകളിലെങ്കിലും പുതിയ അധ്യാപകരെത്തും. ഇനിയൊരു പി.എസ്.സി പരീക്ഷയ്ക്ക് പ്രായം അനുവദിക്കാത്ത പഴയ ലിസ്റ്റിലുള്ള പല ഉദ്യോഗാര്‍ത്ഥികളും കോടതി വിധി ആശ്വാസമാകും.