ശ്രീകൃഷ്ണപുരം:പ്രളയജലം ദുരിതം വിതറി നാശം സൃഷ്ടിച്ചു നാടാകെ വിറങ്ങലിച്ചു നിന്നപ്പോള്‍ കൈത്താങ്ങായി വന്നവര്‍ക്കും കൈ പിടിച്ചുയര്‍ത്തിയവര്‍ക്കും നന്ദി അറിയിച്ച് ദുരിതബാധിതര്‍ മുന്നോട്ടുവന്നത് പുത്തന്‍ അനുഭവമായി. വീടുകളിലേക്ക് വെള്ളം പാഞ്ഞുകയറിയപ്പോള്‍ ക്യാമ്പ് ഒരുക്കിയവര്‍, സഹായഹസ്തം നീട്ടി മുന്നില്‍ വന്നവര്‍, വീടുകള്‍ വൃത്തിയാക്കി വീടുകളിലേക്ക് തിരികെ പോകാന്‍ സഹായിച്ചവര്‍, ശാരീരികാസ്ഥ്യം ഉണ്ടായവര്‍ക്ക് മുന്നില്‍ ചികിത്സയും മരുന്നുമായെത്തിയവര്‍, കന്നുകാലികള്‍ക്ക് സംരക്ഷണമായി വന്നവര്‍, അവരോടെല്ലാം നന്ദി പറയാന്‍ അതിജീവനമെന്ന പേരില്‍ ജനകീയ കൂട്ടായ്മയൊരുക്കി. പുളിയക്കാട്ടു തെരുവില്‍ എം.വി.കിട്ടു സ്മാരക സാംസ്‌ക്കാരിക കേന്ദ്രമൊരുക്കിയ അതിജീവന സദസ്സ് പി.ഉണ്ണി എം.എല്‍.എ ഉദ്ഘാടനം ചെയ്തു.പി.വി.ബാബു അധ്യക്ഷനായി. ബ്ലോക്ക് പ്രസിഡന്റ് പി.അരവിന്ദാക്ഷന്‍, ഗ്രാമ പഞ്ചായത്ത് പ്രസിഡന്റ് സി.എന്‍.ഷാജു ശങ്കര്‍, സി.ഹരിദാസന്‍, എം.വി.സുജേഷ്, കെ.രാജന്‍, നിഷാന്ത്, കുഞ്ഞഹമ്മദ്, ഡോ.ധന്യ, നജീം, എം.രാധാകൃഷ്ണന്‍ സംസാരിച്ചു. ശ്രീകൃഷ്ണപുരം 1 വില്ലേജ്,ഗവ: എഞ്ചി കോളജ്, ശ്രീകൃഷ്ണപുരം ഗ്രാമ, ബ്ലോക്ക് പഞ്ചായത്തുകള്‍, കുടുംബാരോഗ്യ കേന്ദ്രം, മൃഗാശുപത്രി, പോലീസ് സ്റ്റേഷന്‍, എന്നി സ്ഥാപനങ്ങള്‍ക്ക് ആദരവ് നല്കി.