ഗുവഹാത്തി: തെരഞ്ഞെടുപ്പ് കമ്മീഷന്റെ നിര്‍ദ്ദേശങ്ങള്‍ കാറ്റില്‍ പറത്തി ബി.ജെ.പി നേതാക്കള്‍. ഒന്നിനു പിറകെ ഒന്നായി വിദ്വേഷപരാമര്‍ശങ്ങളുമായി രംഗത്തെത്തിയിരിക്കുകയാണ് ബി.ജെ.പി പ്രതിനിധികള്‍. അസമിലെ ബി.ജെ.പി എം.എല്‍.എ പ്രശാന്ത് ഫൂക്കനാണ് വിവാദ പരാമര്‍ശവുമായി രംഗത്തെത്തിയിരിക്കുന്നത്.

'മുസ്‌ലിങ്ങള്‍ പാലുതരാത്ത പശുക്കളാണെന്നും അവരെ തീറ്റിപ്പോറ്റേണ്ട ആവശ്യമില്ലെന്നുമാണ് പ്രശാന്ത് ഫൂക്കന്റെ പരാമര്‍ശം. അസമിലെ 90 ശതമാനം മുസ് ലിങ്ങളും ബി.ജെ.പിക്ക് വോട്ടു ചെയ്യാത്തവരാണ്. പിന്നെന്തിനാണ് പാലു തരാത്ത ഈ പശുക്കളെ തീറ്റിപ്പോറ്റുന്നത്'- പ്രശാന്ത് ഫൂക്കന്‍ ചോദിച്ചു.

ഫൂക്കന്റെ പരാമര്‍ശത്തിനെതിരെ ശക്തമായ വിമര്‍ശനമാണുയരുന്നത്. എം.എല്‍.എക്കെതിരെ നടപടിയെടുക്കണമെന്ന് അസം സ്പീക്കര്‍ ഹിറ്റേന്ദ്ര നാത് ഗോസ്വാമിയോട് പ്രതിപക്ഷ നേതാവ് ദേബബ്രത സെയ്കിയയോട് ആവശ്യപ്പെട്ടു.

ചാനലുകളില്‍ വന്ന ദൃശ്യങ്ങള്‍ അടക്കം നല്‍കിയാണ് പ്രതിപക്ഷം നടപടിയാവശ്യപ്പെട്ടത്. ഫൂക്കനെതിരെ ഗുവാഹത്തി ഹൈക്കോടതിയിലെ മുതിര്‍ന്ന അഭിഭാഷകന്‍ ഹാഫിസ് റാഷിദ് അഹ്മദ് ചൗധരിയും രംഗത്തെത്തി.

ഗവര്‍ണറോ സ്പീക്കറോ ഉടനടി ഫൂക്കനെതിരെ നടപടിയെടുക്കണമെന്ന് ചൗധരി ആവശ്യപ്പെട്ടു. ഇയാള്‍ക്കെതിരെ അഹ്മദ് ചൗധരി പൊലീസില്‍ പരാതി നല്‍കിയിട്ടുണ്ട്. 'അസാമിലെ ഹിന്ദുക്കളെയും മുസ്‌ലിങ്ങളും തമ്മിലുള്ള സാഹോദര്യം തകര്‍ക്കാനാണ് ഫൂക്കന്റെ നീക്കമെന്നും ചൗധരി പറഞ്ഞു.

മുസ്‌ലിങ്ങള്‍ക്കെതിരായി ഒരു തിരഞ്ഞെടുക്കപ്പെട്ട പ്രതിനിധിയുടെ പ്രസ്താവന ലജ്ജാകരമാണെന്നും. ബി.ജെ.പി ഉടന്‍തന്നെ അദ്ദേഹത്തിതിനെരെ നടപടിയെടുക്കണമെന്നും മറ്റൊരു അഭിഭാഷകനായ നെക്കുബര്‍ സമാന്‍ പറഞ്ഞു.

നേരത്തെ തെരഞ്ഞെടുപ്പ് പ്രചരണത്തിനിടെ ഉത്തര്‍പ്രദേശിലെ മുസ്‌ലിം വോട്ടര്‍മാരെ ഭീഷണിപ്പെടുത്തി പ്രസംഗിച്ചതിന് കേന്ദ്രമന്ത്രി മനേകാ ഗാന്ധിക്കെതിരെ കമ്മീഷന്‍ നടപടി എടുത്തിരുന്നു. തെരഞ്ഞെടുപ്പ് പെരുമാറ്റ ചട്ടം ലംഘിച്ചെന്ന് ചൂണ്ടിക്കാട്ടിയായിരുന്നു തെരഞ്ഞെടുപ്പ് കമ്മീഷന്റെ നടപടി.