പെരുമാതുറ: അധികൃതര്‍ കാണാതെ പോയ പ്രളയബാധിത സ്ഥലങ്ങളില്‍ രക്ഷാ ദൗത്യത്തിലേര്‍പ്പെട്ട് മത്സ്യതൊഴിലാളികളടങ്ങിയ അഖില പെരുമാതുറയിലെ ഒന്‍പത് അംഗ സംഘത്തിന് പുതുക്കുറുച്ചി മുസ്‌ലിം ജമാഅത്ത് കമ്മിറ്റി സ്‌നേഹാദരവ് നല്‍കി.
നാടെങ്ങും കേരളത്തിന്റെ സൈന്യമായി മാറിയ മത്സ്യതൊഴിലാളികളെ ആദരിച്ചപ്പോഴൊക്കെ പെരുമാതുറയിലെ ഒന്‍പത് അംഗ സൈന്യത്തെ ആരും കാണാന്‍ ശ്രമിച്ചില്ല. രക്ഷാപ്രവര്‍ത്തനങ്ങളില്‍ ഏര്‍പ്പെടുമ്പോല്‍ സര്‍ക്കാര്‍ നടപടികളോട് പൂര്‍ണമായി സഹകരിച്ച സംഘമാണ് ഇവര്‍. എന്നാല്‍ രേഖകളില്‍ ഇവരുടെ വിവരങ്ങളുണ്ടായിരുന്നില്ല. ഈ സാഹചര്യം കണക്കിലെടുത്താണ് ആരും കാണാതെ പോയ ഈ സംഘത്തെ പുതു കുറുച്ചി മുസ്‌ലിം ജമാഅത്ത് കമ്മിറ്റി ആദരിച്ചത്. പള്ളി അങ്കണത്തില്‍ നടന്ന ചടങ്ങ് കടക്കാവൂര്‍ സര്‍ക്കിള്‍ ഇന്‍സ്‌പെക്ടര്‍ അരുണ്‍ ഉദ്ഘാടനം ചെയ്തു. കഠിനംകുളം പഞ്ചായത്ത് പ്രസിഡന്റ് ഫെലിക്‌സ് മുഖ്യപ്രഭാഷണം നടത്തി.
ജമാഅത്ത് പ്രസിഡന്റ് എച്ച്.എം സഫീര്‍ അധ്യക്ഷനായി. സെക്രട്ടറി കബീര്‍, ചിറയിന്‍കീഴ് പഞ്ചായത്ത് മുന്‍ വൈസ് പ്രസിഡന്റ് അബ്ദുല്‍ വാഹിദ്, ഗ്രേസ് വാലി ചാരിറ്റബിള്‍ ട്രസ്റ്റ് അംഗങ്ങളായ എം.എം ബഷീര്‍, എം.എസ് കമാല്‍, സുദീര്‍ മന്നാനി തുടങ്ങിയവര്‍ സംബന്ധിച്ചു. പെരുമാതുറ നിവാസികളായ അബു, സുഹൈല്‍, സനീദ്, സലിം, സജി, അമീന്‍, സുല്‍ഫി, നിഷാദ്, ജലീല്‍ എന്നിവര്‍ ഉപഹാരം ഏറ്റ് വാങ്ങി.