തിരുവമ്പാടി: മലയോര മേഖലയുടെ വികസന കുതിപ്പിന് ആക്കം കൂട്ടുന്ന തിരുവമ്പാടി കെ.എസ്.ആര്‍.ടി.സി ഡിപ്പോ നിര്‍മാണ ചുമതല യു.എല്‍.സി.സി കമ്പനിക്ക്.

2016-17 വര്‍ഷത്തെ ജോര്‍ജ് എം. തോമസ് എം.എല്‍.എയുടെ ആസ്തി വികസന ഫണ്ടില്‍ നിന്ന് മൂന്നു കോടി രൂപയാണ് ഡിപ്പോ നിര്‍മാണത്തിനായി അനുവദിച്ചിട്ടുള്ളത്. ഇതിന് 2,78,96,160 രൂപയുടെ ഭരണാനുമതി ലഭിച്ചിരുന്നു. നിര്‍മാണ പ്രവര്‍ത്തനങ്ങളെ സംബന്ധിച്ച് ചര്‍ച്ച ചെയ്യാന്‍ സെപ്റ്റംബര്‍ ആറിന് തിരുവമ്പാടിയില്‍ വകുപ്പ് ഉദ്യോഗസ്ഥരുടെയും ഊരാളുങ്കല്‍ പ്രതിനിധികളുടെയും ജനപ്രതിനിധികളുടെയും യോഗം ചേരും.
സബ് ഡിപ്പോ ആയി ഉയര്‍ത്തുമെന്ന പ്രഖ്യാപനത്തോടെ 2011 ഫെബ്രുവരി 28നാണ് തിരുവമ്പാടിയില്‍ കെ.എസ്.ആര്‍.ടി.സി ഓപറേറ്റിങ് സെന്റര്‍ പ്രവര്‍ത്തനം തുടങ്ങിയത്. ആറര വര്‍ഷം പിന്നിടുമ്പോഴും സബ് ഡിപ്പോ കെട്ടിട നിര്‍മാണ നടപടികള്‍ ഇഴഞ്ഞു നീങ്ങുകയായിരുന്നു.
തിരുവമ്പാടി പുല്ലൂരാംപാറ റോഡിന് സമീപം കറ്റിയാട്ടാണ് കെ.എസ്.ആര്‍.ടി.സി സബ് ഡിപ്പോക്കുള്ള 1.75 ഏക്കര്‍ ഭൂമി പഞ്ചായത്ത് 45 ലക്ഷം രൂപക്ക് വാങ്ങിയത്. കെട്ടിട നിര്‍മാണത്തിനായി മുന്‍ എം.എല്‍.എ സി. മോയിന്‍കുട്ടി അനുവദിച്ച 85 ലക്ഷം രൂപ ഉപയോഗിച്ച് ഭൂമി മണ്ണിട്ട് നിരപ്പാക്കി സംരക്ഷണ ഭിത്തി നിര്‍മിച്ചിട്ടുണ്ട്.
ബസ് സ്റ്റാന്‍ഡ്, വര്‍ക്ക്‌ഷോപ്പ് ഉള്‍പ്പെടെയുള്ള കെട്ടിടമാണ് സബ് ഡിപ്പോക്കായി നിര്‍മിക്കേണ്ടത്. കെട്ടിടത്തിന്റെ രൂപരേഖ തയാറാക്കാന്‍ ഊരാളുങ്കല്‍ ലേബര്‍ കോണ്‍ട്രാക്‌റ്റേഴ്‌സ് സൊസൈറ്റിയെ നേരത്തെ തന്നെ ചുമതലപ്പെടുത്തിയിരുന്നു. പരിമിതികളില്‍ വീര്‍പ്പുമുട്ടിയാണ് ഓപറേറ്റിങ് സെന്ററിന്റെ നിലവിലെ പ്രവര്‍ത്തനം. തിരുവമ്പാടി ബസ് സ്റ്റാന്‍ഡിലെ പഞ്ചായത്ത് കെട്ടിടത്തിലാണ് നിലവില്‍ ഓപറേറ്റിങ് സെന്റര്‍ ഓഫിസ് പ്രവര്‍ത്തിക്കുന്നത്. സ്വകാര്യ സ്ഥലത്ത് വാടകക്ക് പ്രവര്‍ത്തിക്കുന്ന വര്‍ക്ക്‌ഷോപ്പ് അസൗകര്യങ്ങള്‍ക്ക് നടുവിലാണ്.
കഴിഞ്ഞ ദിവസങ്ങളിലെ മഴയും ഉരുള്‍പൊട്ടലും മൂലം വര്‍ക്ക്‌ഷോപ്പില്‍ വെള്ളം കയറിയതിനാല്‍ 15 ഓളം ബസുകള്‍ വെള്ളത്തില്‍ മുങ്ങുകയും ഓയില്‍, ഗ്രീസുള്‍പ്പടെ തൊട്ടടുത്ത വീടുകളിലേക്കും കയറുകയും മലിനപ്പെടുകയും ചെയ്തിരുന്നു. മൈസൂര്‍, മൂന്നാര്‍ ഉള്‍പ്പടെ 30ല്‍ പരം സര്‍വിസ് ഇവിടുന്ന നടത്തുന്നുണ്ട്. ശരാശരി 2.85 ലക്ഷം രൂപയാണ് ദിനംപ്രതി കലക്ഷന്‍.