വടുവന്‍ചാല്‍: മൂപ്പൈനാട് പഞ്ചായത്തിലെ ഉള്‍വനത്തില്‍ കഴിയുന്ന പരപ്പന്‍പാറ കോളനിക്കാര്‍ കാലങ്ങള്‍ക്കിപ്പുറം കാടിറങ്ങുന്നു. പഞ്ചായത്തിലെ എട്ടാം വാര്‍ഡില്‍ ചാലിയാറിന്റെ തീരത്ത് നിബിഡ വനത്തിനകത്ത് കഴിയുന്ന 12 ചോലനായ്ക്ക കുടുംബങ്ങളാണ് വനത്തിന് പുറത്തെത്തുന്നത്. ഇവരെ വാര്‍ഡില്‍ തന്നെ ഉള്‍പ്പെട്ട വട്ടത്തുവയലില്‍ പുനരധിവസിപ്പിക്കാനാണ് തീരുമാനം.
2009-ല്‍ മൂപ്പൈനാട് പ്രദേശത്ത് ഉണ്ടായ വലിയ ഉരുള്‍ പൊട്ടലില്‍ പരപ്പന്‍പാറ കോളനിയിലും അപകടം സംഭവിച്ചിരുന്നു. ഇവരെ പുനരധിവസിപ്പിക്കാന്‍ പഞ്ചായത്തും വനം വകുപ്പും ശ്രമങ്ങള്‍ നടത്തിയിരുന്നെങ്കിലും പരാജയപ്പെടുകയായിരുന്നു. തലമുറകളായി കഴിയുന്ന വനവും വനത്തിനകത്തെ ദൈവപ്പുരയും മറ്റും ഉപേക്ഷിക്കാനുള്ള കോളനിയിലെ മുതിര്‍ന്ന അംഗങ്ങളുടെ വൈമനസ്യമാണ് പുനരധിവാസം വൈകിപ്പിച്ചത്. എന്നാല്‍ ജില്ലാ ജഡ്ജ് വിജയകുമാര്‍ വിളിച്ചു ചേര്‍ത്ത പഞ്ചായത്ത്, റവന്യൂ, ഫോറസ്റ്റ് വകുപ്പുകളുടെ സംയുക്ത അദാലത്തിലാണ് ഇവരുടെ പുനരധിവാസം സംബന്ധിച്ച് തീരുമാനമായത്.
കോളനിയിലെ കുടുംബങ്ങള്‍ക്ക് ഓരോ ഏക്കര്‍ വീതം ഭൂമിയും വീടും കുടിവെള്ള സൗകര്യവും ആചാരാനുഷ്ഠാനങ്ങള്‍ക്കുള്ള സൗകര്യവും വട്ടത്തുവയലില്‍ ഒരുക്കുന്നതിനാണ് അദാലത്തില്‍ തീരുമാനിച്ചത്. കൂടാതെ തീരുമാനങ്ങള്‍ നടപ്പിലാക്കാന്‍ ഊരുകൂട്ടത്തിന്റെ അംഗീകരാം നേടാനും തീരുമാനിച്ചിരുന്നു.
തുടര്‍ന്ന് ഇന്നലെ കോളനി നിവാസികളുടെ ദുരിതാശ്വാസ ക്യാംപ് പ്രവര്‍ത്തിക്കുന്ന കാടാശ്ശേരി ആള്‍ട്ടര്‍നേറ്റ് സ്‌കൂളില്‍ ചേര്‍ന്ന ഊരുകൂട്ടമാണ് പുനരധിവാസത്തിന് സന്നദ്ധമാണെന്ന തീരുമാനമെടുത്തത്. വനത്തിന് പുറത്തെത്തണമെന്ന ആവശ്യം കോളനിയിലെ പുതുതലമുറ ശക്തമാക്കിയതോടെയാണ് ഊരുകൂട്ടം അനുകൂല തീരുമാനമെടുത്തത്. കോളനിയിലെ രണ്ടു കുടുംബങ്ങളൊഴിച്ച് 10 കുടുംബങ്ങളും ഊരുകൂട്ടത്തില്‍ പങ്കെടുത്തു. ഊരുമൂപ്പന്‍ ചെറിയ വെളുത്തയുടെ അഭാവത്തില്‍ ഊരിലെ ഏക സര്‍ക്കാര്‍ ഉദ്യോഗസ്ഥന്‍ കൂടിയായ ബാബു അധ്യക്ഷനായി.
മൂപ്പൈനാട് പഞ്ചായത്ത് പ്രസിഡന്റ് ആര്‍. യമുന ഉദ്ഘാടനം ചെയ്തു. ക്ഷേമകാര്യ സ്റ്റാന്‍ഡിങ് കമ്മിറ്റി ചെയര്‍മാന്‍ യഹ്യാഖാന്‍ തലക്കല്‍ പദ്ധതി വിശദീകരിച്ചു. ഫോറസ്റ്റര്‍ അഷ്‌റഫ്, ക്യാംപ് കോഡിനേറ്റര്‍ രാജേഷ്, ഊരിലെ അംഗങ്ങളായ ചെല്ലന്‍, സോമന്‍, ചെറിയ സുരേഷ് എന്നിവര്‍ സംസാരിച്ചു. വാര്‍ഡു മെമ്പര്‍ പി. ഹരിഹരന്‍ സ്വാഗതവും ട്രൈബല്‍ പ്രൊമോര്‍ട്ടര്‍ ശ്യാമള നന്ദിയും പറഞ്ഞു.