ഇരിട്ടി: ആറളം വനത്തില്‍ ഉരുള്‍പൊട്ടിയതിനെ തുടര്‍ന്ന് ചീങ്കണ്ണി, കക്കുവ പുഴകള്‍ നിറഞ്ഞുകവിഞ്ഞു. ആറളം ഫാം പുനരധിവാസ മേഖലയിലെ സോമന്‍, അനിതാ ശശി, ഒടുക്കന്‍ എന്നിവരുടെ വീടുകളില്‍ വെള്ളം കയറി. ഇന്നലെ വൈകിട്ട് 6.30ഓടെയാണ് പുഴകള്‍ നിറഞ്ഞൊഴുകിയത്.
പേരാവൂരില്‍ നിന്ന് അഗ്നിരക്ഷാ സേനയും മുഴക്കുന്ന് പൊലിസും സ്ഥലത്തെത്തി പുഴക്കരയിലെ ജനങ്ങള്‍ക്ക് ജാഗ്രതാ നിര്‍ദേശം നല്‍കി. പാലപ്പുഴ പാലത്തിലൂടെയുള്ള ഗതാഗതം തടഞ്ഞു. അരമണിക്കൂര്‍ കൊണ്ട് പുഴകളിലെ ജലവിതാനം കുറഞ്ഞതോടെയാണ് ഭീതി അകന്നത്. എന്നാല്‍, നെല്ലിയോടിയിലും മറ്റും വിണ്ടുകീറി നില്‍ക്കുന്ന മലകള്‍ ജങ്ങളില്‍ ഭീതി വിതക്കുകയാണ്.