മലപ്പുറം: മന്ത്രി കെ.ടി ജലീല്‍ ഒളിഞ്ഞുനടക്കുന്നതാണ് സംശയമുണ്ടാക്കുന്നതെന്നും ഒളിച്ചുവയ്ക്കലും രഹസ്യമായി യാത്രചെയ്യലുമെല്ലാം കപടന്‍മാരുടെ ലക്ഷണമാണെന്നും മുസ്‌ലിം ലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ്. 

തെറ്റു ചെയ്തിട്ടില്ലെങ്കില്‍ എന്തിനാണ് രഹസ്യനീക്കം നടത്തുന്നത്? എന്‍.ഐ.എ ഒരു മന്ത്രിയെ ചോദ്യംചെയ്യുന്നത് അതീവ ഗൗരവതരമാണ്. ഖുര്‍ആന്‍ കൊണ്ടുവന്നതിനാലാണ് തനിക്കെതിരേ അന്വേഷണം നടക്കുന്നതെന്നു പറഞ്ഞ് മതപണ്ഡിതന്‍മാരെക്കൊണ്ട് വിശദീകരണക്കുറിപ്പിറക്കിക്കാന്‍ ശ്രമിക്കുകയാണ് മന്ത്രി. എന്നാല്‍ സമരം ഖുര്‍ആന്‍ കൊണ്ടുവന്നതിനെതിരായിട്ടൊന്നുമല്ല. സ്വര്‍ണക്കടത്തുമായി ബന്ധിപ്പിക്കുന്ന ചില കാര്യങ്ങള്‍ ഇതിനു പിന്നിലുണ്ടെന്നതിനാലാണ്. ഇതു സംബന്ധിച്ചാണ് അന്വേഷണം നടക്കുന്നത്. 

പ്രതികാരദാഹമാണ് സമരത്തിനു പിന്നിലെന്നു പറയുന്നത് ശരിയല്ല. ഇതു രാഷ്ട്രീയ കാര്യമാണ്. തനിക്കെതിരേ അന്വേഷണം വന്നപ്പോള്‍ മാത്രം താന്‍ തെറ്റു ചെയ്‌തോ ഇല്ലയോ എന്ന് പാണക്കാട് തങ്ങള്‍ പറയട്ടെ എന്ന് പറയുന്നതില്‍ എന്ത് യുക്തിയാണുള്ളതെന്നും മജീദ് ചോദിച്ചു.