കാസര്‍കോട്: പെരിയ ഇരട്ട കൊലപാതകവുമായി ബന്ധപ്പെട്ട് എല്‍.ഡി.എഫ് എം.എല്‍എമാരെ ചോദ്യം ചെയ്തതിന് പിന്നാലെ കൊല്ലപ്പെട്ട കൃപേഷിന്റെ പിതാവിന് നേരെ സി.പി.എം പ്രവര്‍ത്തകരുടെ വധ ഭീഷണി.
ഇരുപത്തഞ്ചോളം വരുന്ന സി.പി.എം പ്രവര്‍ത്തകര്‍ വീടിന്റെ അടുത്ത് വന്ന് കൊല്ലുമെന്നും ഉറങ്ങാന്‍ വിടില്ലെന്നും മകന്റെ ഗതി നിനക്കും ഉണ്ടാകുമെന്നും പറഞ്ഞതായും കൃഷ്ണന്റെ പരാതിയില്‍ പറയുന്നു.

ഇരട്ട കൊലപാതകത്തില്‍ സി.പി.എമ്മിന്റെ ഉന്നത നേതാക്കള്‍ക്ക് പങ്കുെണ്ടന്നും കേസന്വേഷണം സി.ബി.ഐക്ക് വിടണമെന്നും ആവശ്യപ്പെട്ട് കൊല്ലപ്പെട്ടവരുടെ രക്ഷിതാക്കള്‍ ഹൈക്കോടതിയെ സമീപിച്ചിരുന്നു. എന്നാല്‍ അന്വേഷണ ഭാഗമായി എം.എല്‍.എമാരെ ചോദ്യം ചെയ്തതിന് പിന്നാലെയാണ് കൃപേഷിന്റെ പിതാവ് കൃഷ്ണനെ വീട്ടില്‍ കയറി സി.പി.എം.പ്രവര്‍ത്തകര്‍ ഭീഷണിപ്പെടുത്തിയത്. സംഭവത്തില്‍ പൊലിസ് അന്വേഷണം തുടങ്ങിയിട്ടുണ്ട്.
സി.പി.എമ്മിന്റെ ലോക്കല്‍, ഏരിയ, ജില്ലാ തല നേതാക്കള്‍ക്ക് പുറമെ മുന്‍.എം.എല്‍.എ, നിലവിലെ എം.എല്‍.എ, എന്നിവര്‍ക്കും ഗൂഢാലോചനയില്‍ പങ്കുെണ്ടന്ന് ആരോപിച്ചു വരുകയാണ്. കേസിലെ മൂന്നു പ്രതികള്‍ ജാമ്യാഅപേക്ഷയുമായി ഹൈക്കോടതിയെ സമീപിച്ചു. കേസില്‍ റിമാന്‍ഡില്‍ കഴിയുന്ന സജി ജോര്‍ജ്ജ്, മുരളി,രഞ്ജിത്ത് എന്നിവരാണ് ഹൈക്കോടതിയെ സമീപിച്ചത്. ഈമാസം 17ആകുമ്പോള്‍ സംഭവം നടന്നു മൂന്നു മാസം പൂര്‍ത്തിയാകും. അതിനിടയില്‍ കുറ്റപത്രം സമര്‍പ്പിച്ചില്ലെങ്കില്‍ പ്രതികള്‍ക്ക് ജാമ്യം ലഭിക്കാനിടയുണ്ട്.