കൊടുവള്ളി: വാഹനം തടഞ്ഞുനിര്‍ത്തി ഗൃഹനാഥനെയും കുടുംബത്തെയും ബൈക്കിലെത്തിയ യുവാക്കള്‍ ആക്രമിച്ച് വാഹനത്തിന്റെ ഗ്ലാസ് അടിച്ചുതകര്‍ത്തു. പൂനൂര്‍ അവേലം പൂവ്വത്തോട്ടത്തില്‍ ഇസ്മായിലും കുടുംബവുമാണ് അക്രമത്തിനിരയായത്.
ഇന്നലെ രാത്രി ഒന്‍പതിനു ദേശീയപാതയില്‍ നെല്ലാങ്കണ്ടിക്ക് സമീപമാണു സംഭവം. കോഴിക്കോട്ടുനിന്ന് പൂനൂരിലെ വീട്ടിലേക്കു വരികയായിരുന്ന തങ്ങളെ ബൈക്കിലെത്തിയ രണ്ടുപേര്‍ പിന്തുടര്‍ന്ന് നിര്‍ത്താന്‍ ആവശ്യപ്പെടുകയായിരുന്നു. തുടര്‍ന്ന് നിര്‍ത്താന്‍ ശ്രമിക്കവേ ബൈക്ക് കാറിനു മുന്നിലിട്ട് തടസം സൃഷ്ടിക്കുകയുമായിരുന്നെന്ന് ഇസ്മായില്‍ പറഞ്ഞു. കാറില്‍ ഇസ്മായിലിനെ കൂടാതെ മൂന്നു സ്ത്രീകളും രണ്ടു കുട്ടികളുമുണ്ടായിരുന്നു.
ബൈക്കില്‍ നിന്നിറങ്ങിയ യുവാക്കള്‍ മദ്യലഹരിയില്‍ കാറിന്റെ ഇടതുവശത്തെ ചില്ല് അടിച്ചുതകര്‍ക്കുകയും അസഭ്യം പറയുകയും കാറിലുള്ളവരെ കൈയേറ്റം ചെയ്യുകയുമായിരുന്നെന്നു കൊടുവള്ളി പൊലിസില്‍ നല്‍കിയ പരാതിയില്‍ പറയുന്നു.
ഇസ്മായിലിനെയും കുടുംബത്തെയും താമരശേരി താലൂക്ക് ആശുപത്രിയില്‍ പ്രവേശിപ്പിച്ചു. സംഭവത്തിനുശേഷം കടന്നുകളഞ്ഞ യുവാക്കളെ കുറിച്ച് അന്വേഷണം നടക്കുകയാണ്.