കാഞ്ഞങ്ങാട്: കാഞ്ഞങ്ങാട് റെയില്‍വേ സ്റ്റേഷനിലെ വാഹന പാര്‍ക്കിങ് സൗകര്യം വിപുലപ്പെടുത്തും. റെയില്‍വേ സ്റ്റേഷനില്‍ പുതിയ സൗകര്യങ്ങള്‍ ഏര്‍പ്പെടുത്തുന്നതിന്റെയും നവീകരിക്കുന്നതിന്റെയും ഭാഗമാണിത്. ഒന്നാം നമ്പര്‍ പ്ലാറ്റ് ഫോറത്തിന്റെ വടക്കുഭാഗം നേരത്തെയുണ്ടായിരുന്ന പാര്‍ക്കിങ് കേന്ദ്രത്തോടു ചേര്‍ന്ന് റെയില്‍വേ ഗേറ്റ് വരെ നീണ്ടുനില്‍ക്കുന്ന സ്ഥലമാണ് പുതുതായി വാഹന പാര്‍ക്കിങിനായി ഏര്‍പ്പെടുത്തുക.
നിലവിലുള്ള ചെറിയ പാര്‍ക്കിങ് ഇടം കഴിഞ്ഞാല്‍ റെയില്‍വേ ഗേറ്റ് വരെയുള്ള സ്ഥലം കാടുപിടിച്ചും ചെളിനിറഞ്ഞും കെട്ടിക്കിടക്കുകയാണ്. ഇതുവെട്ടിത്തെളിച്ചു മണ്ണിട്ടു നികത്തി വാഹന പാര്‍ക്കിങ് ഒരുക്കാന്‍ കാഞ്ഞങ്ങാട് നഗരസഭ നേരത്തെ ഒരു തവണ ശ്രമം നടത്തിയിരുന്നു. എന്നാല്‍ റെയില്‍വേ വകുപ്പ് അതു തടയുകയായിരുന്നു. ആ ജോലിയാണ് ഇപ്പോള്‍ റെയില്‍വേ നേരിട്ട് ചെയ്യാന്‍ തുടങ്ങിയത്.
അത് പോലെ റെയില്‍വേ സ്റ്റേഷന്റെ തെക്കു ഭാഗം അരിമല ഹോസ്പിറ്റലിനു മുന്‍ഭാഗം മുതല്‍ കുശാല്‍ നഗര്‍ റെയില്‍വേ ഗേറ്റ് വരെ ഏക്കര്‍ കണക്കിനു സ്ഥലം കാടുപിടിച്ചും മലിന ജലംകെട്ടിനിന്നും ഉപയോഗിക്കാതെ കിടക്കുന്നുണ്ട്. ഇതുകൂടി സൗകര്യപ്പെടുത്തി റെയില്‍വേ വകുപ്പുമായി ബന്ധപ്പെട്ട എന്തെങ്കിലും പദ്ധതി ആവിഷ്‌കരിക്കണമെന്ന് ഈയിടെ സ്റ്റേഷന്‍ സന്ദര്‍ശിച്ച ഡിവിഷണല്‍ മാനേജര്‍ മുമ്പാകെ റെയില്‍വേ പാസഞ്ചേഴ്‌സ് അസോസിയേഷന്‍ നിവേദനം നല്‍കിയിരുന്നു.