മുക്കം: ജനങ്ങള്‍ക്കിടയില്‍ കടുത്ത ആശങ്കയും പരിഭ്രാന്തിയും പരത്തി മലയോര മേഖലയില്‍ എലിപ്പനി പടരുന്നു. കഴിഞ്ഞ മൂന്ന് ദിവസത്തിനിടെ രണ്ടു പേരാണ് മലയോര മേഖലയില്‍ എലിപ്പനി ബാധിച്ച് മരിച്ചത്.
നിരവധി പേരില്‍ രോഗം സ്ഥിരീകരിക്കുകയും എലിപ്പനി ലക്ഷണങ്ങളോടെ ആശുപത്രിയില്‍ പ്രവേശിപ്പിക്കുകയും ചെയ്തിട്ടുണ്ട്. കാരശ്ശേരി, തിരുവമ്പാടി, കൊടിയത്തുര്‍ പഞ്ചായത്തുകളിലും മുക്കം നഗരസഭയിലുമാണ് പ്രളയക്കെടുതി മൂലം എലിപ്പനി വ്യാപകമായി റിപ്പോര്‍ട്ട് ചെയ്തിരിക്കുന്നത്. പ്രളയ ദുരന്തത്തില്‍ നിന്നും മലയോര മേഖല കരകയറി വരുന്നതിനിടെ അപ്രതീക്ഷിതമായി വന്നെത്തിയ എലിപ്പനി മേഖലയെ കടുത്ത ആശങ്കയിലാഴ്ത്തിയിട്ടുണ്ട്.
മേഖലയിലെ ഭൂരിഭാഗം ജനങ്ങളും വെള്ളപ്പൊക്ക കെടുതി അനുഭവിച്ചവരാണ്. അതിനാല്‍ എലിപ്പനി പടരാനുള്ള സാഹചര്യം ഇവിടെ കൂടുതലാണെന്ന് ആരോഗ്യ പ്രവര്‍ത്തകര്‍ ചൂണ്ടിക്കാട്ടുന്നു. അതേസമയം എലിപ്പനിക്കെതിരേ കനത്ത ജാഗ്രത പുലര്‍ത്തണമെന്നും ആരോഗ്യ പ്രവര്‍ത്തകര്‍ നല്‍കുന്ന മുന്നറിയിപ്പുകളും നിര്‍ദേശങ്ങളും കര്‍ശനമായി പാലിക്കണമെന്നും ആരോഗ്യവകുപ്പ് അറിയിച്ചു.
വിവിധ ആരോഗ്യ കേന്ദ്രങ്ങളിലൂടെ സര്‍ക്കാരിന്റെ നേതൃത്വത്തില്‍ വിതരണം ചെയ്യുന്ന പ്രതിരോധ മരുന്ന് കഴിച്ചാല്‍ എലിപ്പനിയെ തടഞ്ഞു നിര്‍ത്താം. പ്രളയ ജലവുമായി സമ്പര്‍ക്കം പുലര്‍ത്തിയ മുഴുവനാളുകളും പ്രതിരോധ മരുന്ന് കഴിക്കണമെന്നും രോഗലക്ഷണങ്ങള്‍ കണ്ടാല്‍ എത്രയും പെട്ടെന്ന് തന്നെ ആശുപത്രിയില്‍ പോയി ചികിത്സ തേടണമെന്നും ആരോഗ്യവകുപ്പ് നിര്‍ദേശിച്ചു. അതീവ ജാഗ്രത സാഹചര്യം കണക്കിലെടുത്ത് ജില്ലയില്‍ കണ്‍ട്രോള്‍ റൂമും തുറന്നിട്ടുണ്ട്.
ബോധവല്‍ക്കരണ
കാംപയിന്‍ ആരംഭിച്ചു
മുക്കം: പ്രളയാനന്തരം ജില്ലയില്‍ വ്യാപിച്ചുകൊണ്ടിരിക്കുന്ന പകര്‍ച്ചവ്യാധികള്‍ക്കെതിരേ മുന്‍കരുതലുകള്‍ എടുക്കുക എന്ന ലക്ഷ്യത്തോടെ കളന്‍തോട് കെ.എം.സി.ടി കോളജ് ഓഫ് എന്‍ജിനീയറിങ് എന്‍.എസ്.എസ് യൂനിറ്റിന്റെ ആഭിമുഖ്യത്തില്‍ കാംപയിന്‍ ആരംഭിച്ചു.
കാംപയിനോടനുബന്ധിച്ച് ബോധവല്‍കരണ ക്ലാസ്, പി.എച്ച്.സിയില്‍ നിന്നുള്ള ലഘുലേഖ വിതരണം, പോസ്റ്റര്‍ പ്രദര്‍ശനം എന്നിവ സംഘടിപ്പിച്ചു. പരിപാടി കെ.എം.സി.ടി കോളജ് ഓഫ് എന്‍ജിനീയറിങ് പ്രിന്‍സിപ്പല്‍ പ്രൊഫ. സി. രഞ്ജിത്ത് ഉദ്ഘാടനം ചെയ്തു. എന്‍.എസ്.എസ് പ്രോഗ്രാം ഓഫിസര്‍ പി.സി ഷമീം, ടീന ജോര്‍ജ്, കെ. ജിഷ്ണു, ഷാഹീന്‍ഷാ, റംസി സംസാരിച്ചു.