തിരുവനന്തപുരം: തദ്ദേശ ഉപതെരഞ്ഞെടുപ്പ് നടക്കുന്ന തിരുവനന്തപുരം കോര്‍പ്പറേഷനിലെ പാപ്പനംകോട് വാര്‍ഡില്‍ ഇടതു നേതാക്കളുടെയും ഇടതു കൗണ്‍സിലര്‍മാരുടെയും നേതൃത്വത്തില്‍ വ്യാപക പണപ്പിരിവ്. തെരഞ്ഞെടുപ്പിന് ദിവസങ്ങള്‍ മാത്രം ശേഷിക്കെയാണ് വ്യാപാരികളില്‍ നിന്നും അന്യായമായി പണപ്പിരിവ് നടത്തുന്നത്. തെരഞ്ഞെടുപ്പിന്റെ പേരില്‍ നഗരത്തിലെയും വന്‍കിട വ്യാപാര ശാലകളിലും വസ്ത്രശാലകളിലും പണപ്പിരിവ് നടക്കുന്നുണ്ട്.
നേരത്തെ നടന്ന തെരഞ്ഞെടുപ്പില്‍ ബി.ജെ.പിക്ക് മുന്‍തൂക്കമുണ്ടായിരുന്ന വാര്‍ഡ് ഉപതെരഞ്ഞെടുപ്പില്‍ തിരിച്ചുപിടിക്കാനുള്ള ശ്രമങ്ങള്‍ ഇടതുകോട്ടയില്‍ നടക്കുന്നുണ്ട്. ഭരണം മാറിയതോടെ ഇടതു യൂനിയനുകളും ഇത്തരം അതിക്രമങ്ങള്‍ക്ക് കൂട്ടുനില്‍ക്കുന്നുണ്ട്. യൂനിയനുകളുടെ അറിവോടെയാണ് വ്യാപാരികളില്‍ നിന്നും അന്യായമായി പണം ഈടാക്കുന്നതെന്ന ആരോപണവും നിലനില്‍ക്കുന്നു. പിരിവ് നല്‍കാത്ത വ്യാപാരികളോട് പലവിധ പ്രതികാര നടപടികള്‍ സ്വീകരിക്കുന്നതായി പരാതി ഉയര്‍ന്നിട്ടുണ്ട്. ഈ മാസം 28നാണ് പാപ്പനംകോട് പഞ്ചായത്തിലെ ഉപതെരഞ്ഞെടുപ്പ് നടക്കുന്നത്.