മനാമ: ഫലസ്ഥീനിന്‍റെ പരമാധികാരം അംഗീകരിച്ച് മുന്നോട്ടു പോകുമെന്ന ബഹ്റൈന്‍റെ പ്രഖ്യാപിത നിലപാടില്‍ ഒരു വിട്ടുവീഴ്ചയുമില്ലെന്നും ഇസ്രാഈലുമായുള്ള കരാര്‍ ഏതെങ്കിലും രാഷ്ട്രത്തിനോ സമൂഹത്തിനോ എതിരല്ലെന്നും ബഹ്റൈന്‍ രാജാവ് ഹമദ് ബിന്‍ ഈസ ആല്‍ ഖലീഫ വ്യക്തമാക്കി.
കിഴക്കന്‍ ജറൂസലം കേന്ദ്രമാക്കി സ്വതന്ത്ര ഫലസ്ഥീന്‍ രാഷ്ട്രത്തെ അംഗീകരിക്കമെന്നതാണ് നേരത്തെ തന്നെയുള്ള ബഹ്റൈന്‍റെ പ്രഖ്യാപിത നിലപാടെന്നും അദ്ധേഹം പറഞ്ഞു.
ഇവിടെ ഗുദൈബിയ പാലസില്‍ ചേര്‍ന്ന മന്ത്രിസഭാ യോഗത്തിലാണ് ഫലസ്ഥീനുമായുള്ള രാജ്യത്തിന്‍റെ ബന്ധവും നിലപാടും രാജാവ് വ്യക്തമാക്കിയത്.
ഇസ്രാഈലുമായി കരാറിലേര്‍പ്പെട്ടതിനെ കുറിച്ചും രാജാവ് വിശദീകരിച്ചു.
ഇസ്റാഈലുമായി ബഹ്റൈന്‍ കരാര്‍ ഒപ്പിട്ടത് ഏതെങ്കിലും രാഷ്ട്രങ്ങളും സമൂഹവും അവര്‍ക്കെതിരാണെന്ന് കരുതരുത്. പൂര്‍ണ്ണമായ സമാധാനത്തിലേക്കുള്ള രാജ്യത്തിന്‍റെ ചുവടുവെപ്പാണിത്.എല്ലാ രാഷ്ട്രങ്ങളോടും മത വിഭാഗങ്ങളോടും തുറന്ന സമീപനമാണ് ബഹ്റൈന്‍ പാരന്പര്യമെന്നും രാജാവ് കൂട്ടിച്ചേര്‍ത്തു.
കിരീടാവകാശിയും ഒന്നാം ഉപപ്രധാനമന്ത്രിയുമായ പ്രിന്‍സ് ഖലീഫ ബിന്‍ സല്‍മാന്‍ ആല്‍ ഖലീഫയുടെ സാന്നിധ്യത്തിലാണ് കാബിനറ്റ് യോഗം ചേര്‍ന്നത്. യോഗ തീരുമാനങ്ങള്‍ സെക്രട്ടറി ഡോ.യാസിര്‍ ബിന്‍ ഈസ അന്നാസിര്‍ വിശദീകരിച്ചു. കൊവി‍‍ഡ് മഹാമാരിയെ തുരത്താന്‍ ഒറ്റക്കെട്ടായി പ്രവര്‍ത്തിക്കുന്ന ബഹ്റൈന്‍ ജനതയെയും ആരോഗ്യപ്രവര്‍ത്തകരെയും മന്ത്രിസഭ പ്രത്യേകം പ്രശംസിച്ചതായും അദ്ധേഹം അറിയിച്ചു.