പൂക്കോട്ടുംപാടം: അമരമ്പലം ഗ്രാമപഞ്ചായത്ത് വികസന കാര്യ സ്ഥിരം സമിതി അധ്യക്ഷയും രണ്ടാംവാര്‍ഡ് അംഗവുമായ അനിതാരാജു ഗ്രാമപഞ്ചായത്ത് അംഗത്വംരാജിവെച്ചു. ഇന്നലെ രാവിലെ ഗ്രാമപഞ്ചായത്ത് സെക്രട്ടറി വി. ശിവദാസന്‍ നായര്‍ക്ക് നേരിട്ടാണ് അനിതാരാജു രാജിസമര്‍പ്പിച്ചത്.
450 ല്‍പ്പരം വോട്ടോടെ അമരമ്പലം പഞ്ചായത്തിലെ രണ്ടാം വാര്‍ഡായ ഉപ്പുവള്ളിയില്‍ നിന്നും യുഡിഎഫ്സ്ഥാനാര്‍ഥിയായാണ് അനിതാരാജു വിജയിച്ചത്. തുടര്‍ന്ന് വികസനകാര്യ സ്ഥിരം സമിതി അധ്യക്ഷ സ്ഥാനവും അനിതക്ക് ലഭിച്ചു. എന്നാല്‍ സ്ഥാനം ലഭിച്ചുവെന്നല്ലാതെ വികസന കാര്യങ്ങള്‍ ചര്‍ച്ച ചെയുമ്പോള്‍ തന്നെയും, തന്റെ വാര്‍ഡിനെയും നിലവിലെ യുഡിഎഫ് ഭരണസമിതി തഴയുന്നതായും, ഇത്തരം വിഷയങ്ങള്‍ ബോര്‍ഡ് യോഗത്തില്‍ ചര്‍ച്ച ചെയുമ്പോള്‍ യുഡിഎഫിലെ മറ്റൊരംഗം തന്നോട് രാജിവച്ച് പോവാന്‍ ആവശ്യപ്പെട്ടതായും അനിതാരാജു പറഞ്ഞു. വാര്‍ഡിന്റെ വികസന പ്രവര്‍ത്തികളില്‍ വേണ്ടത്ര പ്രവര്‍ത്തികള്‍ നടത്താന്‍ കഴിയാത്തതിന്റെ കാരണംപൊതുജനങ്ങളെ ബോധ്യപ്പെടുത്തുന്നതിനും, സ്ത്രീയെന്ന നിലയില്‍ യുഡിഎഫിലെ പുരുഷ അംഗങ്ങളുടെ അധിക്ഷേപത്തില്‍ പ്രതിഷേധിച്ചാണ് താന്‍ രാജിവെക്കുന്നതെന്നും അനിതാരാജു വ്യക്തമാക്കി.