മൊഗാദിഷു: സൊമാലിയയില്‍ യു.എസ് വ്യോമസേന നടത്തിയ ബോംബാക്രമണത്തില്‍ 13 ഐ.എസ് ഭീകരര്‍ കൊല്ലപ്പെട്ടു. അര്‍ധ സ്വയംഭരണ പ്രദേശമായ പന്റ്‌ലാന്റിലായിരുന്നു ആക്രമണം. ഇവിടെ ഏതാനും ദിവസം മുന്‍പ് നടത്തിയ ആക്രമണത്തില്‍ മൂന്നു ഭീകരര്‍ കൊല്ലപ്പെട്ടിരുന്നു.
പ്രസിഡന്റായി ഡൊണാള്‍ഡ് ട്രംപ് അധികാരമേറ്റ ശേഷം രണ്ടുവര്‍ഷത്തിനിടെ 800 ഐ.എസ് ഭീകരരെ വധിക്കാന്‍ യു.എസ് ആക്രമണങ്ങള്‍ക്കു കഴിഞ്ഞിട്ടുണ്ട്. ഒരുകാലത്ത് സൊമാലിയയുടെ വലിയ ഭാഗം നിയന്ത്രിച്ച അല്‍ഖാഇദ ബന്ധമുള്ള തീവ്രവാദ സംഘടനയായ അല്‍ശബാബുമായി താരതമ്യപ്പെടുത്തുമ്പോള്‍ ഇവിടെ ഐ.എസിന് കാര്യമായ സ്വാധീനമില്ലെങ്കിലും പന്റ്‌ലാന്റ് കേന്ദ്രമാക്കി അവര്‍ യുവാക്കളെ സംഘടനയില്‍ ചേര്‍ക്കുന്നതായി റിപ്പോര്‍ട്ടുണ്ട്. ഗോലിസ് കുന്നുകളിലെ ഐ.എസ് ക്യാംപുകളെയാണ് ലക്ഷ്യം വച്ചതെന്ന് യു.എസ് ആഫ്രിക്ക കമാന്റ് (ആഫ്രിക്കോം) പറഞ്ഞു. ഏപ്രിലില്‍ ഐ.എസിന്റെ ഉപമേധാവിയായ അബ്ദുല്‍ ഹകീം ഗുഖാബിനെ വധിച്ചതായി ആഫ്രിക്കോം അറിയിച്ചു.
അതേസമയം യു.എസ് ആക്രമണത്തില്‍ നിരവധി നിരപരാധികളും കൊല്ലപ്പെട്ടതായി ആംനെസ്റ്റി വ്യക്തമാക്കി. ഏപ്രിലില്‍ നടത്തിയ ആക്രമണത്തില്‍ ഒരു സ്ത്രീയും കുട്ടിയും കൊല്ലപ്പെട്ടതായി ആഫ്രിക്കോം സമ്മതിച്ചിരുന്നു.